Draft Electoral Roll tlangzarh

Special Summary Revision of Photo Electoral Roll, 2021 atana hman tur Draft Electoral Roll chu nimin khan district tinah district election officer (DEO)-te'n an district-a mi ṭheuh an tlangzarh.

DEO-te hian political party tin aiawhte hnenah draft electoral roll copy an pe nghal a; hetih lai hian, sorkar thuchhuahah district hrang hranga voter zat an tarlan vek loh avangin Mizoram puma Draft Electoral Roll-a voter awm zat hriat theih a ni rih lo.

Electoral roll ennawn­naah hian nimin aṭanga December 15, 2020 thleng paih, thun thar, siamṭhat ngai leh insawn duhte tan dilna (claims & objection) tih theih niin, booth level officer (BLO)-te hnenah thehluh theih a ni a; www.nvsp.in aṭangin dilna thehluh theih a ni bawk.

December 15, 2020 thlenga dilna lutte chu December 15 aṭanga January 10, 2021 thleng ERO/AERO-te'n an endik ang a; ERO-in enfiaha thutlukna an siam hnuah, hming thun luh, paih leh siamṭhat ngaite chu DEO pisaa Election Branch-in a thliar hrang leh ang. Final electoral roll chu January 20, 2021-ah tlangzarh tum a ni.

Draft Electoral Roll 2021 hi Aizawlah chuan DEO R Lalramnghaka'n a tlangzarh a; Aizawl Municipal Corporation (AMC) chungchangah District Level Standing Committee an ṭhukhawm nghal.

Aizawl DC/DEO chuan, Electoral Roll ennawn hna chu tluang leh hlawhtling taka neih a nih theih nan fimkhur leh ṭhahnemngai taka thawk turin ERO, AERO leh BLO-te beisei an nih thu a sawi a; local council, village council, political party, tlawmngai pawlte leh media-te ṭawiawmna leh finchhuahna a ngen bawk.

Lungleiah chuan DC Conference Hall-ah DEO V Lalsangliana'n district chhunga Assembly constituency paruka draft roll a tlangzarh. Bawrhsap chuan, khua leh tui, vote nei thei chinte tan vote thlak chu an dikna chanvo leh an mawhphurhna a nih avangin, kum tling tharte leh mi dang, electoral roll-a hming la chuang lote chu inziak lut ngei turin a sáwm.

Champhaiah chuan DEO Maria CT Zuali'n a pisaah a tlangzarh a; DEO chuan, Electoral Roll-a inziah luh hunah hming ziah fimkhur a ngaih thu sawiin, "Zirna leh lehkha pawimawh danga mi nen inmil thlapa ziah zel a ṭha," a ti a, E.Roll felfai tak neih a nih theih nan tlawmngai pawl leh political party-te thawhpuiah a sáwm.

Kolasib-ah pawh DC Conference Hall-ah DEO Dr H Lalthlangliana'n draft roll a tlangzarh a; DEO chuan, roll siamṭhat dilna hun hawn chhung ngeiin siamṭhat ngaite siam a nih theih nan political party aiawh te, khawtlang hruaitute leh mawhphurhna changtu sorkar hnathawkte chu thawk turin a chah. Kolasib district-ah hian electoral roll hmasa aiin draft roll-ah voter 15-in an tlem zawk a ni.

Serchhip district draft electoral roll chu DEO Kumar Abhishek-a'n DC pisa conference hall-ah a tlangzarh a; thu sawiin, "Electoral roll ennawnna hi hlawhtling taka kan neih theih nan tlawmngai pawl, political party, chanchinbumite leh khawtlang hruaitute thawhpuiah ka sawm che u a ni," a ti. Bawrhsap chuan, New Serchhipah polling station thar pahnih siam a nih thu a sawi bawk.

Lawngtlai DEO Dr Andrew H Vanlaldika pawhin a pisaah draft electoral roll a tlangzarh. Lawngtlai district-ah hian Assembly bial pathum - Tuichawng, Lawngtlai West leh Lawngtlai East-te a awm a ni.

Mamitah chuan DEO Dr Lalrozama'n draft electoral roll a tlangzarh a; thu sawiin, electoral roll felfai an neih theihna tur leh a hun taka draft roll tlangzarh a nih theihna tura buaipuitute chungah lawmthu a sawi. Mamit district-ah hian Electoral Roll 2020 aiin draft roll-ah voter -0.31%-in an tlem zawk a ni.

Saitual district draft electoral roll chu additional DC Margaret Lalrinawmi Fanai-in a tlangzarh. Saitual district hian Assembly constituency pathum - Ṭawi, Chalfilh leh Lengtengte a khawih a, district dang nena inpawlh an ni a; voter zat tarlan pawh constituency pathuma mi ni mah se, Saitual district huam chhunga mi bik a ni.

Khawzawl DEO Zothanmawia pawhin DC Conference Hall-ah Draft Electoral Roll a tlangzarh a; India ram chu inthlang ram a nih avangin inthlan a pawimawh a, inthlanna felfai neih a nih theih nan E. Roll dik neih a pawimawh tih sawiin, "Khua leh tui kan nih anga chanvo pawimawh tak kan neih, kan aiawha ram hruaitu thlang thei turin E.Roll-a awm thei chinte chu kan awm vek a ṭul a ni," a ti.

Electoral registration officer (ERO) James Lalnithanga, Khawzawl SDO (Sadar) chuan, tun dinhmunah chuan Khawzawl DEO-in Tuichang Assembly constituency chauh a enkawl dawn tih a sawi a; an district-a khaw ṭhenkhat chu district dang DEO kutah a awm dawn tih a sawi bawk.

Hnahthialah chuan DEO Vanlalmawia'n a pisaah draft roll a tlangzarh. Vanlalmawia chuan, "Electoral roll-a chuan hi khua leh tui nihna a ni a, thil tam tak a keng tel. Kum 18 tling chin, India khua leh tui dik takte chu an chuang ngei tur a ni," a ti. Hnahthial district-ah hian Assembly constituency pakhat, South Tuipui bial chiah a awm a ni.