Assembly budget session ṭan a ni ; Session kaihruai turin eptute'n Speaker Rinliana an duh lo

Mizoram Legislative Assembly pariatna session vawi kuana chu nimin chawhma dar 10:30 khan ṭan a ni a, Governor Dr Hari Babu Kambhampati-a'n thu a sawi. Hetih lai hian, eptu MLA-te chuan session kaihruai turin speaker Lalrinliana Sailo an duh loh thu House Leader hnenah an thlen.

Governor chuan, legislator-te chu an mawhphurhna leh, an tih leh tih loh turte hriaa session neih chhung zawngin House zahawmna vawng nung tlat turin a chah a, sawiho turte zahawm taka sawiho ṭhin turin a chah bawk. Tun ṭum session hian March 10, 2022 thleng a awh dawn a ni.

Dr Hari Babu Kambhampati chuan, Mizoram hmasawnna atana thawk turin MLA-te'n theihtawp an chhuah zel a beisei thu a sawi a, "Rorelna siamṭhat te, sorkar ṭha dinna atan te, information technology lama hmasawnna leh sum dinhmun siamṭhatte hi ngaih pawimawh bik a ṭul. In inlungrualna leh thawhhona ṭha aṭangin Mizoram leh a mipuite hmasawnna, remna leh hlimna a thlen dawn a ni," tiin, MLA-te a fuih.

Larsap chuan, Mizoram sorkar policy leh programme-te leh hlawhtlinna chi hrang hrang a sawi lang a; session hmasa hnuah Tuirial bialah Assembly by-election neih a nih thu sawiin, House member thar K Laldawngliana a lawmpui thu leh duhsakna a hlan thu a sawi.

Hetih lai hian, ZPM Legislature Party leh Congress Legislature Party chuan Assembly speaker Lalrinliana Sailo chu Assembly budget session neih mek kaihruai tlâka an ngaih loh avangin Deputy Speaker kaihhruaitir turin House leader Zoramthanga, chief minister an ngen.

ZLP leh CLP chuan, Ngaizawl kawng laihna sum aṭangin speaker Lalrinliana Sailo-in cheng nuai 100 a ei ve a ni tih hriat a nih thu leh, hmun danga contract hna aṭang pawhin chanvo a nei nuala hriat a nih thu an lehkhaah an tarlang a, "Kan rorelna sang bera min kaihruaitu ni tlakah kan ngai lo a, a kaihhruaina hnuaia rorelna kalpui hi House zahawmna tihbawrhbànnaah kan ngai," an ti.

Lehkhaah hian CLP leader Zodintluanga leh ZLP leader Lalduhoma ten hming an ziak a ni.

Budget session hi vawiinah chhunzawm a ni ang a, session hmasa leh tun ṭum session inkara MLA thite sûnna hun hman a nih dawn bakah, Governor thusawia lawmthu sawina motion sawiho a ni ang. Naktukah Finance changtu chief minister Zoramthanga'n kum 2022-23 Mizoram budget a pharh dawn a, chumi hnuah thuthar thehdarhtute a kâwm nghal ang.