Aizawlah iron rod, cement, balu dawr Mizo hming hawha kalpui 85 a awm

Central YMA hruaitute leh All Mizoram Cement & Iron Rod Dealers' Association (AMCIRDA) hruaitute chu nimin khan CYMA office-ah an inkâwm a; Aizawl khawpui chhungah Mizo hming hawha hnam dangin iron rod, cement leh balu an zawrhna dawr 85 a awm mek thu an tarlang.

Mizorama hnam dang, Mizo hming hawha iron rod, cement leh balu zuar chungchang te, iron rod len zawng leh bûk tling lo chungchangte sawiho a ni a, "Tun din­hmun­ah AMC area-a Mizo hming hawha iron rod, cement leh balu zuar dawr 85 a awm mek a ni," an ti a; Mizo hming hawha sumdawngte dap chhuah kawngah thawhho zel an rél a ni.

CYMA hruaitute chuan nimin vêk khan adviser to chief minis­ter (Technical) K Lalsawmvela chu a pisaah an kâwm bawk a, PMGSY leh fund dang hmanga Mizorama kawng siam chungchang an sawipui.

Inkawmnaah hian PMGSY hnuaia Mizorama kawng siam mek, zawh hun tura tiha zawh hman lohte leh hnathawh ṭha lote CYMA hruaitute chuan an sawi lang a, hna thawhte chu zawh thuai a nih theih nan hma la turin CM Adviser an ngen. Mizorama hna hrang hrang thawk turin contractor hna thawk thei ngei hmang ṭhin turin an ngen bawk.

Tun hnaia PMGSY hnuaia Khawzawl-Ngai­zawl kawng siam mek chu a rang thei ang bera thawh chhunzawm a nih theih nan ruahmanna an siamho a; mipuite dikna chanvo - kawngpui ṭha neih a nih ngei theih nan hmalakho zel an remti bawk a ni.