Contract hna thawka puhna sawifiah turin Assembly speaker Rinliana an phût ; Sorkarin Speaker chungah action a la ngam dawn em? - ZPM Ṭhalai

PMGSY hnuaia Khawzawl-Ngaizawl kawng siam hna, Collin Lalsangpuii hminga Lalrinliana Sailo, Assembly speaker thawh nia sawi chu sawifiah ngei turin ZPM Ṭhalaite chuan Lalrinliana Sailo an phût bakah, a inhnamhnawih a nih chuan Speaker leh MLA aṭanga báng turin an phût.

ZPM Ṭhalai hruaitute chuan nimin khan thuthar theh­­­darhtute an kawm a; an vice president Lalṭanpuia Zote chuan, Khawzawl-Ngaizawl kawng siam hna phuai luai taka thawh a ni tih sawiin, "Ngaizawl All NGO & VC Coordination Committee-in he kawng siam hna hi Pi Collin Lalsangpuii hmingin Pu Lalrinliana Sailo-in a thawk niin an tarlang," a ti.

Ngaizawl khawtlangin an puhna chu sawifiah ngei turin speaker Lalrinliana Sailo an phut tih sawiin Lalṭanpuia Zote chuan, "Kawng siam mekah estimate aṭanga cheng nuai 100 lo fanghma no eitu nia sawi Speaker hian Representation of the People Act, 1951 Section 9A bawhchhiain, contract hna thawhnaah a inhnamhnawih a nih chuan Speaker a nihna leh MLA a nihna bànsan ngei turin kan phût a ni," a ti a; hna thawhna tur cheng nuai 100 a la nia sawi pawh pe lêt ngei turin an phût tih a sawi.

Mizorama contract hna thawh a chhiat ṭhin chhan ber chu, contract hmutuin thawk loa mi dang an thawhtir ṭhin te, hralh chhâwn te, mi dang hminga thawhte a nih ṭhin vang a nih thu sawiin ZPM Ṭhalai hruaitute chuan, "Hetiang hi tihtawp a nih theihna tura hmalak a hnêka kan Speaker hming a rawn lang ta mai hi a lungchhiatthlak kan ti," an ti a; Lalrinliana Sailo chungah Mizoram sorkarin action a la ngam dawn em tih Mizoram mipuiin an thlir mek thu an sawi bawk.