Vawk natna hri lakah rálkhèl dár vua

Mizoram ṭhenawm, Myanmar, Assam, Arunachal Pradesh leh Meghalaya state-ah African Swine Fever (ASF) a léng mek a; Mizorama a luh lohna turin AH&Vety department chuan rálkhèl dár an vua a, theihtawpa invèn hna a thawk mek.

AH&Vety joint director Dr Lalhming­thanga chuan, ASF hi ṭhenawm state-ah a lèn mek vangin Mizoram sorkar pawhin kumin August 19, 2020 khan vawk lak luh khapna a lo tichhuak tawh tih a sawi a, "Kan Minister hoin State Level Coordination Committee din a ni a, district-ah DC kaihhruaiin din a ni. He hri hi lo lut palh se, vawk thi phûmbo dan tur pawh ruahman a ni tawh," a ti.

State páwn aṭangin vawksa leh a rêp bakah, vawksa aṭang siam rêng rêng Mizorama lak luh loh an duh thu sawiin Dr Lalhmingthanga chuan, "Shillong vawksa rêp pawh lak luh miah loh kan duh," a ti a; vawk lak luh chu dan kalh a nih thu a sawi.