Vairengte-Sairang kawng zauh turah Zangnadawmna tihfel theih la ni lo

Ministry of Road Transport & Highways (MoRTH) hmalaknaa NH-06 leh NH-306 (Vairengte leh Sairang inkar) kawngpui zauh tur chu zangnadawmna pek tura tih a tam lutuk avangin hna ṭan theih a la ni lo. NHIDCL chuan zangnadawmna pek zat tura tih chu tam an tih avangin survey an nei ṭha leh mek.

NH-06 leh NH-306 zauh tur hian Aizawl thleng a huam dawn a, Vairengte leh Mualkhang inkar bik chu phase paliah ṭhen a ni. Phase pahnih pawm a ni tawh a, phase pahnih dang MoRTH-in an zir chiang mek. Mualkhang leh Aizawl inkar bik chu phase hnihah ṭhen a ni a, kawng zauhna tur (alignment) a tìra ruahman chu thlâk tum a nih avangin ram lâk tur tihfel a la ni lo.

Zangnadawmna chungchang buaipui tura Mizoram sorkarin a ruat, Competent Authority for Land Acquisition (CALA), Kolasib Additional DC chuan Vairengte-North Chhimluang inkara zangnadawmna zat tur chu NHIDCL-ah a thehlut tawh a, Kawnpui leh a chhehvelah thlai man hlut zawng chhût mek a ni.

Vairengte leh Chhimluang inkara kawng zauhna atana ram laka zangnadawmna ngai zat tur a thehluh chu cheng vbc. 220 vel a ni a; chutih laiin, NHIDCL-in an lo ruahman lâwk chu cheng vbc. 150 vel a ni thung.

Vanglaini thu dawn danin, NHIDCL hian consultancy firm ruaiin, zangnadawmna ngai tur zat hi an lo chhût ve a ni. NHIDCL hian ram lakna atana zangnadawmna atana pek ngai zat chu àwm an ti a, thlai man atana pek ngai tura CALA-in a chhût erawh chu an pawm thei lo.

CALA chuan, Vairengte leh a chhehvelah kuhva leh coconut an chìn nasat thu sawiin, "Thlai man a to lo thei lo. Zangnadawmna pek a nih dawna thlai man zat tur bithliah sa a awm a, kuhva rah leh coconut hi a man a sang. Consultancy firm-te hi a hmunah kal loin, zangnadawmna ngai zat tur an chhût a ni," a ti.

Hetih lai hian, Vairengte leh a chhehvela ram lâk tur neitu intél khawm, NH-306 Land Owners' Association hruaitute chuan, CALA-in zangnadawmna tura a thehluh pawm loa survey neih ṭhat a ni leh chu an lungawi lo a, an lungawi loh thu NHIDCL General Manager hnenah an thawn a, a copy Chief Minister, Kolasib DC leh CALA hnenah an thawn tel a ni.

Ram neitute thu thawn
1) NHIDCL-in thlai man Vairengte leh Chhimluang inkara an survey-na atan a hmuna kal loin satellite an hmang a, hei hi a rintlak loh avangin pawm chi a ni lo.
2) NH-306 four lane tura notification chhuah a nih hnuah kan rama hnathawh kan chawlhsan a, hei hian kan economy nasa takin a tibuai.
3) NHIDCL chuan thlai man hlut zawng hi ram neitute pawh ráwn mumal loin an chhut ṭha leh a, hei hian zangnadawmna kan dawn tur a tikhawtlai a, kan dikna chanvo ngaih pawimawh lohnaah kan ngai.
4) Keini chuan CALA hoa VC leh ram neitute hming an ziah hnan thlap kan ring.
5) A rang thei ang berin Ministry of Road Transport-in CALA-in assesment a neih angin zangnadawmna an pe tur a ni.