KHAWTHLIR

Result puang dawn
Mizoram Board of School Education (MBSE) chuan vawiin chhun dar 12 hian Diploma in Elementary Education Examination, 2021 (December) result a puang dawn. Result hi MBSE pisaah târ chhuah a ni dawn lo a, MBSE website www.mbse.edu.in ah en theih a ni ang.

Lungleiah titawp
Lunglei bawrhsap Kulothungan A chuan February 21, Thawhṭanni zan khan thupek chhuahin, Lunglei district-ah thu leh awm hma zawng zan curfew leh red zone hlih/tihtawp a nih thu a puang. Covid-19 chungchanga inkaihhruainate ṭha taka zawm turin mipui a chah nghal bawk.

World Thinking Day
Kolasib District Scouts and Guides chuan nimin khan Kolasib-a Sports & Youth Services office-ah World Thinking Day an hmang a, SYS pisa ramah thing an phun nghal. Kumina World Thinking Day thupui chu 'Our world, Our equal future' tih hman a ni.

Duhsakna hlân
Peoples' Conference party chuan thuchhuah siamin, Assembly budget session ṭan takah a tìr aṭanga a tàwp thlenga ram leh mipui hmakhua ngaia ṭhahnemngai taka rorel turin MLA-te duhsakna an hlan a; "Party rilru dahṭha a, ram tana ṭha tur leh hmasawnna hmel lanna tur a nih dawn chuan lungrual taka thutlukna siam hreh lo turin MLA-te kan chah. Kristian MLA rilru puthmang àwm rênga mawi leh zahawm taka rorelna kalpui turin kan ngen bawk," an ti.

Test vek ngai lo
Health secretary R Lalramnghaka chuan, state páwn aṭanga Mizorama lutte tana kaihhruaina tihdanglam a nih thu a puang a; January 5, 2022-a hriattirna tihchhuah chu hmang tawh loin, October 14, 2021-a hriattirna tihchhuah tawh hman leh tawh tur a nih thu a tarlang. Mizorama lut apiang RAT hmanga enfiah a ni tawh dawn lo a; RT-PCR/TrueNAT/CBNAAT hmanga swab test negative result darkar 72 aia rei lo nei te, Covid-19 vaccine full dose certificate neite leh thla thum aia rei loa Covid-19 positive tawhte chu RAT hmanga swab test a ngai tawh dawn lo a ni.