Gas company hotute CM-in a kâwm

Chief minister Zoramthanga chuan February 21, Thawhṭanni tlai khan Assam Gas Company Ltd. (AGCL) leh Indradhanush Gas Grid Ltd. (IGGL) hotute Chief Minister's Office (CMO)-ah a kâwm a; Mizoram hmasawn nan thawh dunna neih ṭha a tih thu a sawi.

IGGL chief executive officer Ajit Thakur chuan, Mizorama national gas grid a luhna tura hma an lak dan a tarlang a; cadastral survey an buaipui mek tihchak nan sorkar puihna an mamawh thu a sawi a ni.

AGCL managing director Gokul Swargiyari chuan, Meiduma gas lâk chhuah a nih theihna tura an ṭangkai theih dan leh Mizoram sorkar an puih theih dante sawiin, Mizoram sorkar thawhpui an duh thu a sawi.

Gokul Swargiyari chuan, Meiduma gas awm zat azirin kawlphetha siamna atana hman ṭangkai theih dan te, eirawngbawlna gas pipe-a consumer-te pek theih dan leh compress natural gas (CNG)-a hman ṭangkai theih dante a sawi bawk.

Sorkar thuchhuah tarlan danin, IGGL hi sorkar laipuiin hmarchhak state khawpui zawng zawngte gas pipeline-a thlun zawm hna a pe a; Guwahati, Silchar leh Tripura-ahte hna an ṭan tawh. Mizorama gas pipeline lut tur chu Tripura-a Panisagar aṭanga Mamit district paltlangin Aizawl a thleng dawn a ni. Pipeline chu feet khat biala lian tur niin, km 127-a thui a ni dawn a, IGGL hian kumin June thlaah Mizoramah hna an thawh ṭan beisei a ni.