Aizawl Press Club tan inbûkna hlân

AMC Ward-X councillor Chuauzikpuii chuan MJA kum 50 tlinna, golden jubilee lawmpuina atan nimin khan Aizawl Press Club tan inbûkna - digital weight scale leh hmai tuamna ṭhahnem tak MJA hnenah a hlan.

Chuauzikpuii chuan, media-a bulṭan a nih avangin a rilruah media a la lian hle tih sawiin, "Journalist-te che vel ka la ngaihven reng a, MJA-in kum 50 a tlin lawmpuina atan thilpek tláwm tê, MJA member-te tana ṭangkai tur nia ka hriat ka rawn hlan a ni," a ti.

MJA aiawha thilpek dawngtu MJA president Zonunsanga Khiangte chuan, Chuauzikpuii chu media chhungkua aṭanga tuna a dinhmuna lut a nih avangin an lawmpui thu sawiin, councillor a nihna anga a hmalakna leh hnathawhna kal zel turah duhsakna a hlan a; MJA tana a thilpek avangin an lawm thu a sawi.

MJA hian kumin 2022 hian kum 50 a tling a, January 7, 2022 khan district tinah golden jubilee mei an dêt tawh a, jubilee lawmna pui ber chu March 23, 2022-ah hman an tum a ni.