Covid-19 vangin mi 646 thi tawh

Nimin khan tlai dar 5 thlengin Mizoramah Covid-19 vanga thi an awm lo a, February 21, Thawhṭanni zan khan mi pathum an thi. Mizoramah hripui vangin mi 646 an thi tawh a, kumin February thla bikah mi 36 an thi tawh.

February 21, Thawhṭanni tlai dar 5 khan Nguntlemi (98), Champhai Zotlang chu hripui vangin Champhai DCHC-ah a thi a, Covid-19 vei a ni tih February 14 khan hmuh chhuah a ni. Zan dar 6:20 khan Lalbeli (48), Chanmari West chu State Referral Hospital-ah a thi a, hripui vei a ni tih February 19 khan hmuh niin, a tuk February 20 khan SRH-ah dah luh a ni.

F Lalbiaknungi (35), Armed Veng South pawh February 21 zan dar 10 khan SRH-ah a thi a, natna dang nei tel a ni. Covid-19 positive a ni tih February 11 khan hmuh chhuah a ni a, SRH-ah enkawl nghal a ni tih sorkar thuchhuakin a tarlang.