Party dangte'n dâwt hmangin nasa takin min bei - Sapdanga

ZPM working president K Sapdanga chuan, ZPM party-in hma a sawn zel chu ngaithei loin dâwt hmangin party dangte'n nasa taka an beih mek thu a sawi.

Nimina Siahaa ZPM zawm tharte lawm luhna inkhawmah thu sawiin K Sapdanga chuan, "Tuna kan sorkar hrawn mek MNF ministry leh Congress party-te hian kan party hmasawn zel ngai thei loin dâwt hmangin nasa takin min bei mek a, party chhungah hruaitute zingah inbeihna awm ni àwm taktein social media-ahte theihtawp an chhuah a ni," a ti.

ZPM Working President chuan, ZPM party-in hruaitute zingah buaina an nei lo tih a sawi a, "Party dangte'n kan inlungrualna leh thawhhona tichhe tura min beihna a ni tih Zoram mipui hian hria se kan duh. Party ṭhenkhatte'n an mite hìp nan ZPM nen kan thawkho dawn titein thu an lo thehdarh ṭhin a, ZPM hian eng party mah thawhpui tumna a la nei lo," tiin a sawi.

Thla leh lawkah MDC an inthlang dawn tih sawiin Sapdanga chuan, theihtawpa an ṭan a ngai dawn tih a sawi a, "ZPM chuan Pathian remtih loh leh therhlo hmanga campaign kan ti ve ngai lo a, Pathian malsawm tlakin kan campaign tur a ni. Hun rei tak aṭang khan sum leh therhlo hmangin kan moral tihchhiat a lo ni tawh a, kan ram tluchhe mek siam ṭha tur leh kawng dika kan ram a kal leh theih nan ZPM chuan theihtawpin kan bei zel dawn a ni," a ti.