Nasa lehzuala ṭawngṭai turin Health Minister-in mipui a ngen

Health minister Dr R Lalthangliana chuan Covid-19 chungchangah nimin khan Mizoram mipui hnena thuchah a tichhuak. Sorkar bakah, mipuiin Covid-19 donaah tih tur an neih thu a sawi a, nasa lehzuala ṭawngṭai turin mipui a ngen.

Dr R Lalthangliana chuan, Mizoramah Covid-19 vei mi panga an thi tawh chu pawi a tih thu sawiin, "Health Minister ka nihna ang pawhin pawi ka ti tak zet a, lusúnte thinlung takin ka tawrhpui a, keimah mai bakah, Zoram mipuite'n kan tawrhpui a ni. Lusûn chhungte Pathianin thlamuan se tih hi ka ṭawngṭaina a ni," a ti.

Covid-19 vei enkawltute chu lawmthu hrilhin R Lalthangliana chuan, "In rilru a náin in hnual hle a ni tih ka hria a. Pathian remruat kan dang thei lo a, theihtawp tak meuh in chhuah tih kan hria a, beidawng loin, theihtawp chhuah zel ang che u," a ti a; mipuiin an thlamuanpui a ni tih hre reng turin a chah.

Health Minister chuan, mipui thuawihna azarah leh thawktute ṭhahnemngaihna zarah Aizawla lockdown puan chu a tihlawhtling thawkhata a hriat thu sawiin, "Thawktute'n theihtawp an chhuah a, sample pawh kan test tam hle. Tun hnaia positive hmuhte pawh hri an kaina chu an chhungte leh chênpuite an ni ta deuh zel a, symptom nei pawh an tlem rih," a ti.

Health Minister-in a tarlan danin, Mizoramah swab sample 1,31,172 endik a ni tawh a, chu'ng zinga mi 3,396 chuan hripui an vei tih hmuh niin, chu chu test zat aṭangin 2.60% a ni.