Health Minister in RIPANS-a hnathawh a en

Health minister Dr R Lalthangliana chuan February 21, Thawhṭanni tlai khan Regional Institute of Paramedical and Nursing Sciences (RIPANS), Zemabawk tihchangtlunna tura sorkar laipuiin cheng vbc 480.12 a ruahman aṭanga hna thawh mek a en.

Dr R Lalthangliana chuan, Mizoram sorkarin RIPANS tihchangtlun a ngai pawimawh nia sawiin, "Health Minister chanvo ka lak veleh sorkar laipui lamah ka bawhzui nghal a, theihtawp chhuaha kan ṭan tlânna zarah February 28, 2019 khan kan nawr chhuak a ni," a ti a; contractor-te chu ṭan la tura chahin, sorkar laipuiin sum zawng zawng a tum avangin harsatna a awm lo tura an ngaih thu a sawi.

Zemabawka JICA sum hmanga Cancer Superspeciality Hospital sakna tur cheng vbc. 500 pawh sorkar laipuiin a pawm tawh tih sawiin Minister chuan, "Kumin chhungin hna thawh ṭan beisei a ni. Mizoram State Cancer Institute chhungah cancer hospital building thar kan hawng tawh a, cancer hemna khawl lian LINAC pawh kum kal ta khan Chief Minister-in a hawng tawh bawk. Cancer hemna khawl dang Cobalt Therapy kan neih sa pawh thlak kan tum a, khawl thar ṭha ber chiin rei lo têah kan thlak thei tawh dawn," a ti.

RIPANS tihchangtlunna atan hian sorkar laipui chuan cheng vbc. 480.12 a ruahman a, chuta ṭanga cheng vbc 217 chu in hrang hrang sakna tur niin, a bak zawng chu post graduate course pasarih hawn thar belhna tur leh thawktu mi 154 lak tharna senso leh hlawh tur a ni a, sorkar laipuiin thawktu thar lak a phalsak tawh.