Champhaiah chawimawina hun hmang

Champhai Circuit House-ah nimin khan Champhai district-a kut hnathawktu hlawhtling mi 10 leh thisen pe ngun ber PC Lalchuangkima te chawimawina buatsaih a ni a, bawrhsap Maria CT Zuali'n a hmanpui.

Maria CT Zuali chuan, Champhai district-a kawng hrang hranga mi hlawhtlingte chawimawi tura ruahmanna siam dan sawiin, "Kut hnathawktute'n thawhrimna leh sorkar thupek chhuahte an zawm ṭhin avangin hlawhtlinna ropui tak an chang ṭhin. African Swine Fever laka Champhai a him theihna turin hmalak a ni a, hei hian Champhai district nasa takin a veng him a ni," a ti.

Hripui léng avanga ramri khâr a nih hnuah Mizoram chu ei leh bara a intodelh lohzia a lang tih sawiin Bawrhsap chuan, "Hei hian Mizote thinlungah nasa takin ṭan lak duhna pein, mi tam takin ran vulh lamah ṭan an la a, hlawhtling tam tak an awm bawk," a ti a, ṭan la thar zel tura a duh thu a sawi.

Champhai district-a thisen pe tam ber chawimawina an hlan PC Lalchuangkima, Bethel Veng chuan thisen unit 76 a pe tawh a; DC chuan, MYC leh District Skill Committee bultuma ei leh in siam zir zo mi 12 hnenah hmanrua a hlan nghal bawk.