Covid-19 vei pakhat thih belh

Covid-19 vei SRH-ZMC ICU-a enkawl lai Rengchhuana (79), Seling chu nimin chawhnu dar 2:40 khan a thi. Mizorama Covid-19 positive thi pangana a ni.

Seling Branch YMA hruaitute hnen aṭanga Vanglaini thu dawn danin, Rengchhuana hi taksa hrisel lohna avangin Aizawl lama inenkawl turin an rawn chhukpui a, chumi ní vêk chuan Ebenezer Hospital-ah Covid-19 a vei tih hmuhchhuah niin, ZMC-ah enkawl zui a ni. A nupui leh an fanu chu Covid-19 an vei avangin CCC-ah enkawl mek an ni.

Rengchhuana ruang hi nizan khan SRH-ZMC ruang dahnaah dah a ni a, tukin zingah Seling panpui tura ruahman niin, zing dar 9-ah thlànmualah vui a ni ang. Rengchhuana hian Covid-19 a vei bakah, cancer a vei bawk nia thu dawn a ni.

Seling YMA hruaitute chuan, Rengchhuana makpa leh a tute pathum pawh home quarantine lai mek an nih avangin an in lam panpui loh turin ruahmanna an siam tih an sawi.