MES (PWD)-a mi pakhat thun tumna Sût nghal turin MZP-in sorkar an phût

Mizo Zirlai Pawl (MZP) Gen. Hqrs chuan thuchhuah siamin, Bamboo Development Agency (BDA)-a assistant engineer Zosangliana Ralte, Mizoram Engineer Service (MES) junior grade (PWD cadre) atana lak tura hriattirna Mizoram sorkarin a chhuah chu sût leh nghal turin sorkar an ngen. Notification sût a nih loh chuan, sût a nih theih nan hma an lak zui dawn thu an puang.

MZP chuan, tun hnaia Mizoram sorkarin DPAR Notification No. A.12031/3/2019-P&AR(GSW), dated 5th November, 2020 hmanga BDA-a assistant engineer pakhat, MES (PWD cadre)-a dah ngheh (absorb) tura a ti chu pawi an tih thu leh hriatthiam har an tih tak zet thu an tarlang a, "Uchuak taka induhsakna leh ṭhalai hna zawng mekte tana thil pawi tak a nih avangin rang taka order hi sût nghal turin Mizoram sorkar kan ngen a ni," an ti.

Sorkarin mi pakhat MES-a thunna tura thil a kalpui dan chu engineer zir mekteah a ṭha lo záwnga nghawng lian tak nei tur leh zirlaite tibeidawngtu a nih theih dan thlir chungin, MZP chuan Mizo ṭhalaite hmakhua ngaiin notification chhuah tawh chu hnûk lêt nghal turin Chief Minister hnenah ngenna an thehlut a ni.

MZP chuan, mimal induhsakna uchuak vanga hnaa inthun tumna awm ṭhin chu an hua a, an dodal ṭhin tih sawiin, "Sorkar leh department-in a mamawh vang leh thiamna bik neite chu hriatthiamna zau tak kan lo nei. MPSC-in dan dik taka MES tur mi 17 a lâk tawh pawh tun thlengin appointment pek an la nih loh laia mi bik leh mamawh vang pawh ni lo, induhsakna vang chauha hna sang leh pawimawh appointment order pek a ni hi MPSC rin lohna lian tak a nih bakah, zirlaite leh ṭhalai hna zawng mekte tan rilru hnualna a thlen mek a ni," an ti.

MZP hian, notification/order chhuah tawh hnûk lêt tura an ngenna chu a hlawhtlin ngei an beisei a; order hnuh lêt a nih loh chuan a ṭul angin hma a la zel dawn tih an puang a ni.