Hripui donaa hlawhchhamah sorkar puh

Mizoram Pradesh Cong­ress Committee (MPCC) chuan nimin khan thuchhuah siamin, Mizoram sorkar chu Covid-19 donaa hlawhchhamah an puh a; India hmarchhak state pasarih zinga swab sample endik tam lamah pangana a nih mek thu an tarlang.

MPCC chuan, Mizoram sorkarin Covid-19 a donaah ‘Ṭanrual hun a ni e’ an tih avangin thil ṭulah lo chuan sorkar an sawisel ngai lo nia sawiin, "Opposition party kan nih angin Covid-19 dona kawnga sorkar hlawhchhamna leh a rorel fuh tâwk lote tarlan a hun ta niin kan ngai," an ti.

MNF sorkar chu Covid-19 donaah a hlawhchham êm avangin Mizoramah Covid-19 a darh hluai thu leh thihna hial a thlen phah nia an ngaih thu an sawi a; "MNF sorkarin Covid-19 donaa che ṭha ber state-a an inchhàl laiin, hmarchhak state pasarih zinga sample test tam lamah pangana a ni mek a, sample test chak lo berte zinga mi a ni," an ti a; thla riat chuang Covid-19 vangin Mizoram a buai tawh chungin, tunah ZMC-a laboratory bak chu BSL-3 tling zo laboratory an la din loh thu an sawi.

Congress party chuan, mipuiin CM Relief Fund-ah cheng vbc. 20 chuang an thawh khawm tawh tih sawiin, "Chu'ng zinga a tam zawk chu sorkar bungrua leh kháwl lei nan hman a nih avangin mipuiin pawisa an thawh ṭha duh tawh lo," an ti.

MPCC tarlan danin, October 20, 2020 aṭangin chawhrualin ni tin Covid-19 positive mi 30 chuang hmuh chhuah ziah ang a ni a; chu chu mipuiin thu kan âwih loh avang ni loin, sorkarin thutlukna dik lo tak tak a siam vangah an ngai.

Congress party chuan sorkar thutlukna kaihhnawiha Mizorama Covid-19 a darh hluai chhan nia an ngaihte an tarlang a; chu'ngte chu - VC/LC inthlan an buatsaih luih vang te, CCC aṭanga dam chiang loin mi eng emaw zat chhuahtir vang te, ICMR-in rintlak tâwk loa a ngaih RAT hmanga Covid-19 vei tawhte endik an nih vang te, kohhran inkhawm phal a nih loh laia sikul kaltir vang te, sorkarin sample a test chak loh vangte a ni.