Jt. NGO-in Bru-te an camp-ah Vote thlaktir tum a nih chuan A ṭul anga hmalak an tum

NGO Coordination Committee (Joint NGO) chuan, Election Commission of India (ECI) hotute'n October 16-17 chhunga Aizawl an rawn tlawh ṭumin, Tripura relief camp-a Bru-te an camp-a vote thlaktir an duh loh thu an thlen nawn leh a; an thu thlen chu a hlawhtlin loh chuan a ṭul anga hmalak an tum.

Vanglaini palai zawhna chhangin Joint NGO chairman Vanlalruata, Central YMA president ni bawk chuan, Tripura relief camp-a Bru-te an camp-a vote thlaktir chu NGO Coordination Committee-te'n an remtih ngai dawn loh thu a sawi a, "Mizoram chhungah chauh vote thlaktir kan remtih thu ECI hotute hnenah pawh kan thlen leh a ni. Mizo mipuite kan ṭan rual phawt chuan Bru-te hi an camp-ah vote kan thlaktir loh theih ngei kan ring," a ti.

Vanlalruata chuan, Mizoram chhungah pawh a hranpaa Tripura-a Bru-te vote thlakna tur siam an remtih loh thu sawiin, "Hemi chungchang pawh hi ECI hotute hnenah kan thlen a, mi náwlpui rualin vote an thlak ve mai tur a ni," a ti a; Tripura-a Bru-te'n vote'n Mizorama mi náwlpui anga vote an thlak theih dan tur a ṭul chuan NGO-te pawhin an ngaihtuah mai tur thu a sawi.

Mizoram electoral roll aṭangin Tripura relief camp-a Bru-te paih tura ECI hotute an ngen tawh thu sawiin CYMA President chuan, "Anni chuan inthlan zawhah state sorkarin hma la se an duh. Inthlan zawha sorkar thar a pian hunah an hmalak dan kan ngaichâng dawn a ni," a ti.

Joint NGO Chairman chuan, kum 2014 Lok Sabha MP inthlan dawnah ECI-in ziakin Tripura relief camp-a Bru-te Parliament leh Assembly inthlanah vote thlaktir loh an intiam tih sawiin, "Kha tih lai khan tuna chief election commissioner Om Prakash Rawat pawh hi member a ni. Kum 2014 hnuah pawh ṭum eng emaw zat kan hmu leh tawh a, kan thil duh a hre chiang," a ti a; ECI chu an intiamna hlen ngei tura an phût thu a sawi.

Chief Election Commission Om Prakash Rawat chuan October 17, Nilaini khan Aijal Club-a press meet a neihah Vanglaini palai zawhna chhangin, kumin MLA inthlan turah Mizoram Bru, Tripura relief camp-a awm mekte chu vote thlak phalsak an nih thu leh, Election Commission of India (ECI)-in thil ṭul ang ang a bawhzui dawn thu a sawi a ni.

Mizoram Bru-te an awmna camp-a vote thlaktir an nih dawn leh dawn loh chungchanga chhangin CEC chuan, "Vote thlak thei an ni a, vote thlak phalsak an ni. Chuta tan chuan ECI-in state level leh district level-ah officer-te a sawipui tawh a, ECI chuan tih tur ṭul ang ang a ti dawn a ni," tiin a sawi.