BJP nen kan thawkho dawn lo - ZPM Chairman

Zoram Peoples Move­ment (ZPM) Steering Committee chairman Lalliansawta chuan thu­chhuah siamin, BJP president Prof. JV Hluna nen telephone-a an inbiak dan a sawifiah a; ZPM chu BJP nen an thawhho dawn loh thu a tarlang.

ZPM Chairman chuan, October 15, 2018-a ZPM chhung inkhawmnaa a thu sawi chungchanga ZPM Publicity department-in press release an siam­ah mipui leh ZPM chhung­kaw tana ngaih sual palh theih tur a awma a lan thu a tarlang a, "Mizoram state BJP President pawhin vairam aṭangin thawhho a duh thu phone hmangin min rawn bia a, kum rei tak Zoram mipuite kaihruai tawhtu Congress leh MNF ni lo sorkar siam hi kan sawi fo tawh angin, anni pawhin an duh loh thu a rawn sawi ve a ni," a ti.

Lalliansawta chuan, "ZPM chuan Kristianna leh kan sakhua humhim hi a din chhan pawimawh tak a nih avangin BJP nena thawhho hi remchang lo niin ZPM hotute chuan kan hria. Kan hma inthlan lo awm turah pawh, nimin piah maia Mizoram BJP President min rawn phone tih loh chu thawhho tuma inbiakna kan nei lo," a ti a; inbiak tumna pawh an nei lo tih a sawi.

ZPM Chairman chuan, "ZPM hi pawl hrang hrangte ît leh thawh­pui châkawm khawp­in a lo lianin, mipui pawhin sorkarna siam turah hiala min lo hmuh avangin pawl ṭhenkhatin pawhin thawhpuiah min sáwm a, lawmawm hle," a ti a; chutih rualin, BJP Presi­dent nena phone-a inbiak leh an press release vanga kohhran leh Mizo mipui, ZPM ṭantute rilru an tihnat palh a awm chuan ngaihdam a dil a ni.