L Biakliana pualin seminar buatsaih

Mizoram University-a Mizo department, Mizo Academy of Letters (MAL), Saitual College leh Saitual Literature Club-te chuan nimin khan 'International Seminar Commenemorating The Birth Centenary of L Biakliana' an buatsaih a, Nagaland governor PB Acharya-a'n a hawng.

PB Acharya chuan, khawtlang leh ram tana ro tling L Biakliana te ang chu nasa zawka mipui hriat chian tura pho chhuah a, an nuna zir tur hrang hrang awmte ṭhalaite nun kaihruaitu a nih theih nan uar zawka tarlan a ngai tih a sawi a, "Khawtlanga hmeichhia leh mipa intluktlanna atana theihtawpa ṭan lak a ṭul," a ti a; zirlaite chu degree vang ringawta zirna-in bêl lo a, hmasawn tumna tak tak nena an zirnate kalpui turin a fuih.

Mizoram sorkara Home secretary Lalnun­mawia Chuaungo pawhin thu sawiin, L Biakliana nuna ṭhalaite tana entawn tur hrang hrang awmte a sawi a, "Ṭhalaite'n hna thawh hreh kan nei ṭhin hi kan hmasawnna tur min dâltu a ni fo ṭhin," a ti a; zirlaite chu an hmaa hna awm reng rengte phûr taka thawk ngam zel turin a chah.

Seminar-ah hian thu­ziak lama mi thiam Mi­zoram University, ICFAI University, Champhai College, Saitual College leh ram páwn aṭangin United Kingdom leh Myan­mar aṭangtein an tel a, vawiinah chhunzawm a ni ang.