Ṭhalaite khawvel thar atan nasa zawkin Hma kan la zel dawn - Joseph Lalhimpuia

Mizoram Pradesh Congress Committee (MPCC) chuan nimin khan Aizawl Press Club-ah thuthar thehdarhtute an kâwm a; thusawitu, Lunglei East bialtu MLA Joseph Lalhimpuia (Mizoram Youth Commission chairman) chuan, an party chuan ṭhalaite khawvel thar atan nasa zawka hma an lak zel dawn thu a sawi.

Joseph Lalhimpuia chuan, MNF hruaitute zingah MYC aia chak zawk din an tum tih sawi an awm thu sawiin, "MYC hi MNF-in an din, hma an lak hman tâk loh a ni. An beisei aia chakin hma kan la a, district tinah ṭhalaite tan youth centre kan din dawn. Tun aia nasa zawkin ṭhalaite khawvel thar atan hma kan la zel dawn a ni," a ti.

MYC hotute'n tun hma aṭangin hma an lak thu sawiin Joseph Lalhimpuia chuan, "Kan awm ve hma pawhin MYC hmalakna vanga civil service-a inziak tling eng emaw zat an awm. Ṭhalaite an fing telh telh a, MYC hi an bawh nasa taah ka ngai," a ti a; MYC chuan an budget pangngai bakah, NEDP pian hnuah sum an hmuh belh thu a sawi.

Lalhimpuia chuan, Lal Than­hawla kaihhruai sorkarin Mizo ṭhalaite tan theihtawp chhuahin hma a la nia sawiin, "Mizoramah hna kan indaih lo hle a, Mizo ṭhalaite'n India ram hmun zau zawka eizawnna an hmuh theihna atan theihtawpin sorkarin hma a la a ni. Ṭhalaite talent leh thiamna phawrh chhuah sak a, an thawh awm tawk hna an thawh theihna atan zirtir an ni," a ti.

Joseph Lalhimpuia chuan, BJP general secretary Ram Madhav-a'n service sector industry-a Mizo ṭha­laite'n hna an neih theihna atana an hmalakna dêusawh takin a sawi nia sawiin, "Hriat sual a nei maiah ka ngai. Ṭhalaite hi IAS, IPS ni vek thei se tih hi kan duhthusam a ni a, mahse, officer ropui an ni vek thei lo," a ti a; officer ni thei lote hna thawh tur Mizoram sorkarin a zawnsak thu a sawi.

Kawng chi hrang hranga hma­sawnna Mizoramin a mamawh zingah ṭhalaite tana hmasawnna siam chu thil pawimawh tak a nih thu sawiin, Lalhimpuia chuan, "MNF-in an rúla raw neih mai mai MYC kha Congress sorkar chuan ṭangkai taka hmangin, kawng chi hrang hrangah ṭhalaite tan kawng a hawnsak a ni," a ti.