KHAWTHLIR

Exhibition hawng
Information & Public Relations department leh Mizoram Photographers' Society ṭangkawp chuan nimin aṭang khan Millennium Centre ground floor-ah 'Grand Photo Exhibition & Competition 2018' an buatsaih a, Planning secretary Dr C Vanlalramsanga'n a hawng. Exhibition hian October 28 thleng a awh dawn a, thlalak 250 pho chhuah a ni.

Mamitah training
Mamit DC office leh Mamit District Industries Centre ṭangkawp chuan nimin khan Siamliana Hall, Mamitah Skill Development Training on Handloom Weaving an buatsaih a, Mamit khawpui chhunga handloom lama tui mi eng emaw zat an tel.

Faina hnatlang
Fire & Emergency Service, Hunthar Venga chuan tun hnaia pisa fai lawmman pahnihna an dawn lawmna atan nimin khan an office leh hmun hrang hranga fire station tifaiin an hnatlang.

YMA Rorel
YMA Rorel Inkhawm vawi hnihna chu vawiin hian Vanapa Hall-ah neih a ni dawn a, chawhma dar 10:30-ah ṭan a ni ang. YMA Rorel Inkhawmah hian CYMA president Vanlalruata kaihhruaiin agenda hrang hrang ngaihtuah a ni dawn a, zaithiamte an zai dawn bakah, Mizo zinga thisen pe tamte lehYMA hruaitu hlunte hnenah chawimawina hlan a ni ang a, hall kawtah exhibition neih a ni ang. Palaite tan CYMA office, Tuikhuahtlangah zanriah buatsaih a ni dawn.

PS thlak
Lunglei District Level Standing Committee on Rationlisation of Polling Station chu nimin khan addl. DC Benjamin Lalzama hoin DC conference hall-ah an ṭhukhawm a, polling station (PS) parukte rualbanlote leh tar chak lote tana vote thlak a awlsam zawkna atan leh a buil-dingte a ṭhat tawk tawh loh avangin an thlak.