T Romana College-in Cultural Day hmang

T Romana College chuan October 17-18, 2018 chhung khan an college-ah Cultural Day an hmang a, nimin khan MJA president Zonunsanga Khiangte leh MJA hruaitu dangte'n an hmanpui.

MJA President chuan, Mizoramah college eng emaw zat a awm tawh laiin, cultural day hmang thei an tam loh thu sawiin, cultural day hmang satliah pawh ni lo a, 'Aia upa zah' tih thupuia an hmang chu ropui a tih thu a sawi.

Mizote nunah aia upa zahna a tlahniam tial tiala a lan thu sawiin Zonunsanga Khiangte chuan, "Kan thupui hi a takin hmang zui ila, T Tomana College zirlai sang rualin a taka an hman a, mi dang tana entawn tur an siam chuan awmzia thui tak a neih ngei ka ring," a ti a; an awmna hmun apianga Zo nun ze mawi vawn nung reng turin T Romana College zirlaite a chah.

College principal Dr Lalrintluanga pawhin thu sawiin, Mizote chu pipute aṭangin mi dangte aia thawk tam zawk, ei tlem zawk nih tum ṭhin an nih thu sawiin, chu chu ṭhangtharte'n an vawn zel a pawimawh thu a sawi a, "Aia upa zah hi Mizo nun ze mawi a ni a, tunah pawh a la mawi reng a, a Kristian em em a ni," a ti.

T Romana College Cultural Day-ah hian 'Aia upa zah' tih thupui hmangin zirtirtu L Biakthianghlima'n thu a sawi a, Mizo chhangban, kurtai leh thingpui sen ruai an kîlho. Cultural Day hman chhungin Mizoram State Museum nen ṭang dunin Mizo hnam zia tarlanna chi hrang hrang pholan nan exhibition buatsaih a ni a; zirlaite leh thawktute hnam zia tilang thei hmanga inthuamin, hnam zai leh lâmin hun an hmang bawk.

T Romana College hi kum 1992-a din a ni a, Arts zirna niin, subject pariat a awm. Kum 2018-19 session-ah hian zirlai 1,073 leh thawktu 58 an awm a ni.