Mizoram record kan siam dawn - Zodintluanga

Congress party-a Campaign Committee chairman Zodin­tluanga chuan, nimin khan a bial, Thorang constituency-a campaign hawnna inkhawm, Phairuangkai khuaah a buatsaih a; Congress party chuan Mizoram record thar siamin, a záwnin term thum an sorkar dawn niin a sawi.

Zodintluanga chuan, kum 2018 inthlan awm turah MNF party-in innghahna an nei lo nia sawiin, "Mizoram dung leh vangah Congress hi ngati nge mipuiin sorkar leh tura min hmuh tlat kan tih chuan, MNF hian inthlan lo awm tur atan hian innghahna an nei lo a ni. MNF innghahna ber chu 'Mizoramah kum 10 term hnih aia tam an sorkar ngai lo' tih a ni a, hei bak sawi tur an nei lo. Congress sorkarah eirukna leh hlemhlêtna sawi tur an hre lo," a ti.

MNF party mi leh sate'n MNF sorkar an beisei loh avangin party an chhuahsan nasa nia sawiin Zodintluanga chuan, "An sorkar chu ring se MNF hi an chhuahsan hauh lo ang," a ti a; Mizoram pumah Congress-ah harh tharna a thleng mek nia sawiin, kumina inthlanah pawh 2013 inthlana MLA an neih zat 34 aia tam an nei dawn niin a sawi.