Irrigation and Water Resources dept.-in National Water Award dawn an lawm

17th November, 2020

Irrigation and Water Resources (IWR) dept. chuan Ministry of Jal Shakti-in a buatsaih 2nd National Water Award-a category pakhat Best State Award an dawng chu nimin khan an minister C Lalrinsanga hoin a pisa-ah an lawm.

C Lalrinsanga chuan IWR dept.-in lawmman a dawn theih chhan pakhat chu Water Policy kan neih vang a nih thu sawiin, "State hrang hrangte chu Water Policy nei tura beisei kan ni a, Mizoram chuan thawktute theihtawp chhuahna zarah nikumah kan nei tawh. Cabinet erawhin kuminah a pawm a ni. State dang aiin kan kal dan a ṭha a, entawn atana min hmangte hi a lawmawm hle," a ti.

IWR Minister chuan State Water Policy hnuaiah Water Resources Regulatory Authority-in kalphung awmze nei a neih theih nan Mizoram hmun hrang hrang 28 ah ruahtui tlakdan an chhin chhiah tur thu sawiin, "Dan anga tui hman dan phung leh inrenchem dan tur ruahman a ṭul a ni," a ti a, tui hna kang chat zelah tui hman dan uluk taka duanfel a ṭul thu a sawi.

Mizoram chu tui dinhmunah ṭhain lang mah se, ruahtui tlak hma chuan luidungah tui luang tur a awm mang tawh lo thu sawiin C Lalrinsanga chuan, "Hmarchhakah chuan water table bikah a zia pawl kan ni. Mahse, kan loneih dante hi ngun zawkin kan enlet a ngai. Kan tui hmuhna ber ruahtui ven ṭhat a ngai. Kan ram innghahna tak tak pakhat chu IWR dept. hi a ni," a ti.

Award lawmnaah hian IWR secretary Sangchin Chinzah, CE Lalrotluanga leh officer ṭhenkhat an tel. Covid-19 avangin mi huapzo zawkin an lawm thei lo.

National Water Award hi kum 2018 aṭang khan buatsaih ṭan niin a vawihnihna - 2nd National Water Award 2019 chu November 11-12, 2020 chhung khan sem a ni. Hetah hian Category hrang hrang 16 (sawm leh paruk) siam niin Best State (special category)-ah Mizoram chu lawmman pakhatna hlan a ni.

Lawmman la tur hian teh fung hrang hrang hmanga state hrang hrang teh an ni. Water conservation leh a kaihhnawih subject hrang hrangah te, regulation lama hmalakna te, PMKSY leh irrigation scheme hrang hrang kalpui danahte tehfung siam a ni.