ZPM Ṭhalai thusawi sawifiah

Bilkhawthlir North V/C chuan thu­chhuah siamin, ZPM Ṭhalaiin David VL Hmangaiha, Bilkhawthlir Kharzawl Veng kawng laih tawh ringa NLUP link road laih chungchang leh chaw nghei chungchang thuthar thehdarhtute hma an puante an sawifiah.

Bilkhawthlir North V/C tarlan danin, Bilkhawthlir VC ram chhung NH-54/306 Saihapuikawn aṭanga Buhngah Phaitlang zau kawng chu kum 2014-15 ah David VL Hmangaiha'n Phaitlang zau huan neitute nen inbe remin, mau a thlawna la turin ṭawngkamin inremna an siam a; chumi hnuah kawng chu a lai a, mau pawh eng emaw zat a phur chhuak a ni.

Cachar Paper Mill, Panchgram, Assam khâr a nih takah hnuah David VL Hmangaiha pawhin mau hralhna tur a hriat loh avangin mau chu a lak chhunzawm lo a; kum 2016 fûr ruahtui a tlak hnuah a kawng laih sa chu leiminin a hnawh a, mihring tan pawh kal harsa khawpin a awm a ni.

Buhngah Phaitlang zau chu kut hnathawktute'n huan lo ram, châkkhai engkim an lakna a nih avangin Bialtu MLA leh Horticulture department-ah kawng laihsak turin ṭawngkaa an ngen thu tarlangin Bilkhawthlir North V/C chuan, "Kan ngenna hi min tihhlawhtlinsakin, kum 2015-16 ah Horticulture department, Kolasib Division hnuaiah article 275(I) fund aṭangin km. 4 laihna tur cheng nuai 20 sanction a ni. Kawng laih dawn hian David VL Hmangaiha lo laih sa kawng block vek tawh chu clear vek a nih bakah, km.4 laih belh a ni," an ti.

Bilkhawthlir North V/C chuan, kawng ṭha an neih hnuah khawtlang hruaitute'n department-ah fûr leh ṭhála kal theih tura hma laksak tur an ngen leh thu tarlangin, "Kan ngenna min ngaih pawimawhsakin, boulder soling atan NEDP 2017-18 sum aṭangin km.3.5 min sanction leh ta a ni," an ti bawk.