Property return thehluh dan zir

Vigilance department chuan nimin khan Champhai IPR Auditorium-ah sorkar hnathawk group A leh B-te tan online hmanga property return thehluh dan zirna an buatsaih.

Training kaihruaitu Champhai additional DC K Vanlalṭhiana chuan, sorkar hnathawkte chu rinawm taka sum lak luh leh thil neihte, a bik takin ro nghet che sawn thei lo immovable property-te a hun taka thehlut ṭhin turin a chah a, "Huaisen taka mahni thil neih sorkar hnena thehluh chu ringtute tih dan tur a ni a, chutiang ti lote chu an rilru a hah a, an thlamuang tak tak thei lo a ni," a ti a, property return thehluh ṭhat leh ṭhat loh aṭangin eng ang mi nge kan nih tih a hriat theih ṭhin thu a sawi.

Mizoram State e-Governance Society-a junior system integrator John Lalchhandama chuan ‘Online Submission of Property Return’ tih thupuia hmangin online hmanga property return thehluh dan a lem nen a sawifiah.