District kan tipuitling ngei dawn - Zorama

MNF president chuan nimin khan Saitual Auditorium-ah MNF Ṭawi East Block Conference cum Campaign Kick-Off a hmanpui a; thu sawiin, "Pathian leh mipui zarah kan sorkar ngei dawn a, district pathumte kan tipuitling ngei dawn," a ti.

Zoramthanga chuan, MNF chu Pathian leh mipui zarah an sorkar ngei dawn nia sawiin, "Saitual, Khawzawl leh Hnahthial te, Pu Hawla hoa district function-tir an huphurh leh an tih theih loh hi keini chuan kan tipuitling ngei ngei dawn," a ti a; an hun hmasaa budget tlemtea bul ṭanin Congress sorkarin district panga an puante pawh MNF sorkarin an tipuitling thei tih a sawi.

MNF policy SEDP chu mi ṭhenkhatin thil tih theih loh tur angin an sawi tih sawiin Zoramthanga chuan, "Central-in NE state pariatte tana sum dah hi hâi chhuah thiam chuan state khat tan kum khatah cheng vbc. 12000 vel a ni. Central-ah eng pawh sorkar se, keini chuan a hâi chhuah dan kan thiamin kan hre lawk vek a, kan SEDP tihhlawhtlin chu thil awlsam lutuk a ni," a ti.

Ṭawi biala MNF candidate tura ngaih R Lalzirliana pawhin thu sawiin, "Inlungrualna hi politics-ah chuan a pawimawh ber. Min lainattute avangin tuna kan boruak chu MNF leh Congress ṭang dun tur ang hialin kan lang a, hemi tihchhiat tum hian Congres-in pawisa tam tak nen ṭan an la mek a ni," a ti a; chutiang chu ni mah se, Model Code of Conduct puan a nih tawh avangin Congress party mite thil tih chu engah mah ngai lo turin mipui a chah.

R Lalzirliana chuan, Ṭawi bialah politics-a a awm lai ngeiin district an neih a duh ber tih a sawi a, "District tihlawhtling thei tur MNF nena thawh dun hi lungsi takin ka tithlu ta a ni," a ti.