Election e-Atlas Portal tlangzarh

Nimin khan chief secretary Arvind Ray chuan CS conference hall-ah MIRSAC leh NESAC ṭangkawpin an buatsaih, ‘Mizoram Election e-Atlas Portal’ chu a taka hman theih turin a hawng

Chief Secretary chuan, kumina Mizoram Assembly inthlan awm tur atana inbuatsaihna leh inthlan hun thleng pawha ṭangkai tur Election e-Atlas Portal buatsaih a ni chu lawmawm a tih thu a sawi a, "Tunlai thiamna Geographic Information Systems (GIS) hmanga sorkar hna leh inrelbawlna awlsam leh chak zawka kalpui theih a ni ta hian ram hmasawnna tam tak a thlen thei a ni," a ti.

Additional chief electoral officer Krishna Mohan Uppu pawhin thu sawiin, "Hetianga GIS thiamna hmanga MIRSAC leh NESAC bultuma Mizoram Election e-Atlas Portal buatsaih leh hman theih a ni ta hi a lawmawm hle," a ti a; Portal hmangin felfai zawk leh rang zawka inthlan buatsaih leh kalpui theih ngei a rin thu a sawi.

MIRSAC member secretary Dr RK Lallianthanga sawi danin, he web portal hi a tirah sorkar official tan chauha hman tura duan a ni a, a hnuah mipui vantlang tan pawh tlawhpawh (access) theiha buatsaih leh a ni.