Covid-19 veite chaw ei man inang pek ZPM Ṭhalaiin duh

Zoram Peoples' Movement (ZPM) Ṭhalai chuan nimin khan thuchhuah siamin, Covid-19 vei enkawlte chu an chaw ei man inangin pek ni se an duh thu an tarlang.

SRH-ZMC leh covid care centre (CCC)-a awmte ei man inang lo pek an ni chu an hrethiam lo tih thu sawiin ZPM Ṭhalai chuan, "CCC-a awmte hian ni khatah Rs. 300 man ei leh in tur an dawn laiin, ZMC-a awmte chuan Rs. 120 man an dawng a, October thla hma lamah phei chuan Rs. 80 man chauh an dawng," an ti a; hripui veite'n ei leh in ṭha an mamawh thu mithiamte'n an sawi laia hri vei zinga enkawl ngai bikte'n ei leh in man an dawng tlem bik chu ṭha lo an tih thu an sawi.

ZPM Ṭhalai chuan, Mizoram sorkarin NEC aṭangin cheng nuai 300, NESIDs aṭangin cheng nuai 647 a dawn tawh thu leh CM Relief Fund-ah sum tam tak mipuiin an chhûn luh tawh thu sawiin, "Sorkarin hri vei enkawl ngai bikte ei leh in man a harsat tlat hi mipuite'n hriatthiam harsa kan ti," an ti. CCC-a awmte nen inang tlanga ei leh in an neih theih nana hma la turin sorkar an ngen a ni.

ZPM ṭhalaite chuan, Covid-19 vei enkawl mekte chu dam leh thuai turin duhsakna an hlan tih an tarlang bawk.