KHAWTHLIR

AH&Vety department chuan nimin khan Mualpui leh Bawngkawn Brigade-a slaughter house-a butcher licence diltute tan a thláwnin ngawr (TB) an kài leh kài loh an endik. Department tarlan danin, TB chu natna hlauhawm, mihring leh mihring bakah, ran aṭanga kài theih a ni. Ran talhtu te, ran talhna leh sâwngbawlna hmun aṭangin TB mipuiah a darh lohna turin a thlàwna TB test hi kalpui a ni.

Nimin khan IPR director Lallianpuii hoin IPR department-a officer-te chuan Press Information Bureau(PIB) assistant director kal chhuak tur, Shariq Noor thlahna hun an hmang a, a kal zelna turah duhsakna an hlân.

Aizawl district election officer R Lalramnghaka, bawrhsap hoa nimina DC conference hall-a ṭhukhawm chuan Aizawl Municipal Corporation inthlan chungchang an sawiho. AMC inthlan turah polling station zinga voter 1,000 aia tam awmnate chu sem darh a ṭul thu te, voter 1,000 aia tam awmna polling station 100 vel a awm thu leh, PS lian zualte chu ṭhen a nih theih nan dilna thehluh mek a nih thute an tarlang.

State Referral Hospital-ah Covid-19 vei mi 43 enkawl mek an ni a, ICU-ah pahnih awmin, a bak zawng Isolation ward-ah an awm. Mi 43 zingah kum 60 chung lam mi 19 leh kum 14 hnuai lam pakhat an tel. SRH-ZMC Bulletin tarlan danin, ICU-a awm mekte'n ventilator an mamawh a, pakhat chu oxygen pek tel a ni. 

Covid-19 dona atan Chief Minister's Relief Fund-ah nimin khan Chief minister Zoramthanga'n a October thla hlawh aṭangin Rs. 48,000 (basic pay aṭanga 60%) a thawh a, Rajya Sabha MP hlui Ronald Sapa Tlau-in Rs. 1,25,000 a thawh bawk. CMRF for Covid19-ah hian cheng vbc. 21.71 a lut tawh a, a tam zawk hman tawh niin, hman loh cheng nuai 220 a la awm.