YMA Rorel Inkhawm vawi 2-na neih a ni ; YMA-in Mizoramah NCR tih ve an duh

YMA Rorel Inkhawm vawi hnihna chu nimin khan Vanapa Hall-ah neih a ni. National Register of Citizens (NRC) Mizoramah kalpui a nih ve theih nana hmalak an rel a; mi chhuanawm bik pangate hnenah chawimawina an hlan bakah, YMA hruaitu hlunte hnenah lawmpuina an hlan.

YMA General Conference neih loh kuma kum 2016 aṭanga neih ṭan Rorel Inkhawm hi Central YMA president Vanlalruata'n a kaihruai a; rorel ṭana nih hmain CYMA general secretary Lalhmachhuana leh finance secretary Fabian Lalfakawma ten report pein, YMA Khawhar Hlabu (solfa) chu CYMA vice president R Lalngheta'n a tlangzath a, YMA thuthlung sawi rualna hun leh member thite sûnna hun hman a ni. Chawhnuah ramngaw humhalh ṭha, YMA chanchinbu la ṭha leh YMA branch chanchinbu ṭha lawmman sem a ni bawk.

YMA Rorel Inkhawmah hian agenda - sorkar khawh pathum leh YMA khawih pasarih a awm a, kumpuan thupui atana rawt pathum a awm. Agenda-te chu an pawm vek rualin, siam rem hret erawh an nei a; kumpuan thupui atan 'Ram leh hnam humhalh' tih an thlang.

Rorel inkhawmah hian palaite'n tlaiah CYMA pisaah ruai an ṭheh a, zanah Vanapa Hall-ah inkhawm neih leh a ni. CYMA assistant secretary Peter Chhakchhuak-in thupui a sawi a, CYMA president Vanlalruata'n thu a sawi bakah YMA application a tlangzarh. Tuhna humhalh ṭha, veng fai leh thianghlim leh kumpuan bawhzui ṭhate hnenah lawmman hlan niin, video clip intihsiakna result puan leh lawmman semna hun hman a ni a; mi chhuanawm bika ngaih mi panga hnenah chawimawina hlan a ni.

YMA Rorel Inkhawma rorelte
I. SORKAR KHAWIH
1. Mizo Hmeichhiate'n hnam dang pasal (tribal-in non-tribal) an neihin, Schedule tribe status hlihsakna tur 'Social Custum Bill' Mizoram Legislative Assembly-a pass a nih theih nan CYMA-in hma la rawh se.
2. National Register of Citizens (NRC) hi Mizoramah kalpui ve ni rawh se.
3. Champhai-Tahan (Myanmar) bus service tir turin sorkarin hma la rawh se.
II. YMA KHAWIH
1. Mizorama kohhran hrang hrangte nen ram leh hnam humhalhna kawngah thawhhona leh inpumkhatna ṭha zawk kan neih theih nan CYMA-in hma la rawh se.
2. Thiangtlang lama zirna a lo ṭhat zawk theih nan CYMA-in hmalak ni rawh se.
3. Mizo hnam incheina hi dan anga humhalh a nih theih nan hmalak ni rawh se.
4. Mizo ṭawng humhalh kawngah CYMA-in hma la rawh se.
5. Zu leh ruihhlo do kawngah tun aia nasa leh chak zawka branch tinte'n hma kan lak tyheih nan CYMA-in hma la rawh se.
6. Sorkar aṭanga development fund hna thawhte ṭha taka thawh a nih theih nan CYMA-in hma la rawh se.
7. Mipuite'n ration buhfai leh gas bûk dik leh tlinga an lâk theih nan CYMA-in chak leh rualkhai zawkin hma la rawh se.
YMA-in chawimawhna an hlante
1. Lalremsiami d/o Lalthansanga, Kolasib College Veng
Silver medalist, Hockey, Asian Games 2018
2. C Lalremruata s/o CH Remtluanga (L), Electric Veng, Aizawl
Thisen vawi 69 pe tawhtu
3. RC Rokhum s/o Phirdailova, Mission Veng
Thisen vawi 67 pe tawhtu
4. Rebecca Saimawii d/o Saihmingthangi, Dawrpui
Thise vawi 56 pe tawhtu
5. Zothantluangi w/o H Lalbiakṭhuama, Mission Veng
Thisen vawi 56 pe tawhtu