YMA-ah member 4,27,393 an awm

Mizorama tlawmngai pawl lian ber, Young Mizo Association (YMA)-ah member 4,27,393 an awm mek a, chungte chu mipa 2,54,944 leh hmeichhia 1,72,449 an ni.

YMA Rorel Inkhawm, nimina Vanapa Hall-a neiha YMA dinhmun tarlana a lan danin, YMA member zat 4,27,303 hi kum 2011 chhiarpuia Mizorama mihring awm zat 1,097,206 aṭanga chhûtin, Mizorama cheng zinga 38.95 chiah YMA member an ni tihna a ni. YMA hian Mizoram chhung bakah, Mizoram pawnah - Assam, Meghalaya, Manipur, Tripua leh Nagaland-ahte YMA group leh branch a nei a; India ram páwnah Sajek (Bangladesh)-ah branch a nei bawk.

YMA life member mi 10,631 an awm a; YMA branch zingah library nei 392, park/reserve nei 287, sangha dil nei 16 leh sanctuary nei paruk an awm. Mi 2,624-in YMA hruaitu hlun chawimawina an dawng tawh a, kuminah hian hruaitu hlun chawimawina dawng thar mi 64 an awm. YMA chanchinbu chu copy 13,000 tihchhuah mek a ni.

YMA-ah hian branch 804 a awm mek a, group 47 leh sub-headquarters panga a awm. Society Registration Act 1860 (Act XXI of 1860) hnuaia YMA registration no. chu S.R. No. 4 of 1977 a ni.

CYMA finance secretary Fabian Lalfakawma'n finance report a pek danin, YMA General Conference 2017-in Central YMA budget 2017-18 atana an pawm chu Rs. 1,14,87,900 a nih laiin, tun Rorel Inkhawm atana finance report siam thlenga CYMA sum hmuh tawh zat chu Rs. 2,53,99,743 a ni a, budget chu a let aia tam Rs. 1,39,11,843-in an khûm a ni.