Inthlanpui pualin END-in beihpui thlak

Excise & Narcotics department (END) chuan thuchhuah siamin, November 28, 2018-a Mizoram Assembly inthlanpui awm turah boruak rálmuang leh thianghlim tak hnuaia mipuiin vote an thlak theih nan Mizoram pumah zu leh ruihhlo dap beihpui an thlak mek tih an tarlang.

END chuan, Election Commission of India (ECI)-in a beisei angin, zu leh ruihhlo hmanga inthlanna dik tikhawlo thei zawnga mi ṭhenkhat an chet lohna turin zu leh ruihhlo do dan tur ruahmanna mumal tak 'Standard Operating Procedure' (SOP) an siam thu an sawi a, "District tina Excise & Narcotics department thawktute'n theihtawpin hma an la mek zel a; dan loa zu siam, hralh leh leite chu dan anga hrem an nih theihna turin hma an la a ni," an ti.

END chuan, tun kar chhungin Aizawl, Champhai, Kolasib, Serchhip, Vairengte-ahte rakzu siamna hmunpui (factory) eng emaw zat an tichhia a, dan kalh (black)-a zu zawrh tam tham tak manin, ruihhlo heroin leh ganja-te pawh eng emaw zat an man tih an tarlang.

Zin veivâkte phurtu lirthei - bus, maxicab, taxi, etc. khaltute'n zu an in leh in loh fiah nan kawngpui remchang laiah duty-in, breath analyser hmangin endik ṭhin a nih thu an tarlang bawk.