KHAWTHLIR

National seminar
Mizoram University-a Psychology Alumni Association leh MZU Department of Psychology ṭangkawp chuan nimin khan Hrangbana College-ah 'Contemporary Psychological Issues' tih thupuia hmang-in national seminar an buatsaih. Seminar-ah hian mi 30-in paper an present a ni.

Rakzu man
Excise & Narcotics department (END) enforcement staff-te chuan nimin khan Rangvamualah Maruti car MZ-10 G-0829 aṭangin rakzu litre 100 an man a, a neitu Lalengzauva s/o Lalrinmawia (L), Rangvamual Mel-3 an man.

Seventh Day Thalai khawmpui
Adventist ṭhalai, Mizo-ram conference huam chhunga mite chuan October 18, 2018 aṭang khan Kolasib Diakkawn Hall-ah inkhawmpui an hmang a, Diakkawn Middle Schhol-ah free clinic buatsaih a ni a, damdawi cheng nuai 2 chuang man sem a ni.

Phullenah in kâng
Nimin chawhma dar 10 vel khan Phullen khuaa Lalchuanga s/o Vanlalbuanga in, Phullen Vengthar Mualvenga mi chu a kâng, bungrua chuh hman lohin a kâng ral. Kangmei chhuah chhan hriat a ni lo a; Phullen khawtlangin nimin khan chhawmdawl hna an thawk nghal a ni.

Pastor nupui Intawhkhawm
Mizoram Synod hnuaia pastor nupuite chuan October 18, Ningani khan Synod Conference Centre-ah intawhkhawm vawi 40-na an hmang a, pastor nupui ṭhahnem tak an tel. Chawhma lama inkhawm chu Synod Moderator nupui PC Ràwnkaii'n a kaihruai a; B Lalthlamuani ziah 'Fanau enkawl leh incheina' tih leh C January ziah 'Pastor nupui leh a nihna' tihte zirho a ni.

AMWF meeting

All Mizoram Womens’s Federation (AMWF) chuan nimin khan Aizawl Press Club-ah ‘Ram rorelnaa hmeichhiate tel a pawimawhna’ tih thupuia hmangin General Body meeting vawi 5-na an hmang. Meeting kaihruaitu AMWF president Dr Jane R Ralte chuan, an páwlah hmeichhe pawl hrang hrang 12 an tel mek tih a sawi a; special guest Dr Tawnenga, Principal, PUC pawhin fuihna thu a sawi bawk.