INC ticket-a MLA tling an tam ber

Mizoram union territory a nih ṭan kum, 1972 aṭangin Mizoram Member of Legislative Assembly (MLA) ṭum 11 thlan a ni tawh a, Indian

National Congress (INC) ticket-a MLA atana thlan tlin an tam ber.

Mizoram state a nih hma, UT a nih laiin, kum 1972, 1978, 1979 leh 1984-ah Mizoramin MLA seat 30 a nei a; kum 1972-a inthlanah Mizo Union, kum 1978-a inthlanah People Conference (C) party, kum 1979 inthlanah PC party leh kum 1984-a inthlanah INC-te'n hnehna an chang.

Mizoram state-a hlankai a nih hnuah Mizoramin MLA seat 40 a nei a, ṭum sarih state assembly inthlan buatsaih a ni tawh. Kum 1987-a inthlanah MNF, kum 1989-ah INC, kum 1993-ah INC leh PC ṭangkawp, kum 1998-ah MNF leh MPC inkawp, kum 2003-ah MNF, kum 2008-ah INC leh kum 2013-ah INC-te'n hnehna changin sorkar an siam a ni.

Mizorama MLA inthlana MLA seat belhkhawm chu 440 a ni a, seat 440-ah hian seat 165-ah INC ticket-a dingte thlan tlin an ni. INC dawtah chuan MNF ticket-a MLA thlan tlin an tam leh a, MNF ticket-in mi 102 thlan tlin an ni.