Kan sorkar ruala head of department-te Hna thawh tur kan ruahman sa - Zoramthanga

MNF president Zoramthanga chuan, MNF sorkar hunah, an sorkar rualin head of department-te ngaihtuah chawptir ngai loin mei kawha an hnathawh tur an ruahman sa niin a sawi.

Zoramthanga hian MNF Aizawl South-I-in nimina Bethlehem Vengthlang ME School-a Block Confence-ah leh Bungkawn community hall-ah Aizawl West-III MNF Block Conference a hmanpui a; thu sawiin, "Pathian leh mipui zarah kan sorkar ngei dawn a, Mizoram hmasawn nan project leh scheme lian zawng zawng hi sorkar hlimah director-te emaw, head of department-te ruahman chawptir ngai loin, sorkar ruala mei kawha hnathawhtir nghal turin hna thawh tur kan ruahman fel sa thlap a ni," a ti.

Congress party chu an kal darh nasa nia sawiin Zoram­thanga chuan "Tunah chuan Congress leh MNF hisâp dan te, CID report hrang hrangah pawh MNF sorkar tur thu hlir a chiang ta. Kum 10 opposition-a kan awm chhung khan kan ram hmasawnna tura thil engkim inruahman a, inbuatsaih lâwk nan Pathianin inzirna hun min pe a ni," a ti a; kum 10 chhunga an inzirna hun chu an hlâwk phah hle niin a sawi.

Zoramthanga chuan, kum 2008 tàwpa Congress sorkar piang chu 'kihhnawk' tih chhuanlamin harsatna chi tinreng an pal chho nia sawiin, "Development hna an thawk hman lo a, sorkar hmasa sawisel ringawt chhuanlamin hmasawnna kawng an zawh hman lo a, kha kha chhuanlam tling lo a ni. An term hnihnaah chuan kihhnawk sawi a rem tawh si lo a, zu zuarin insawi màmna hlir an zawng a, kohhran hruaitute an elhsèn a ni," a ti.

MNF President chuan, sorkar laipuiah sum hai chhuah tur tam tak a awm nia sawiin, Congress sorkar chu sum hai chhuak thiam loah a puh a, "Project leh scheme felfai tak nen Central-ah tui chawi tur tam tak a awm a, Pu Hawla hian a chawi thiam ve lo a ni," tiin a sawi.