Hmasial vanga Congress aṭanga chhuakah Congress party-in MLA pathumte an puh

R Lalzirliana chu a inah MPCC Disciplinary Action Committee-in lènchilhin an kâwm a, a lo chhàn danah Committee member-te a lo tham lo hle nia sawiin MPCC chuan, "Committee chu a lungawi loh avangin insawifiah turin a ti (show cause notice an pe) a, show cause notice chu Pu R Lalzirliana chuan engahmah a ngaih loh thu leh chhan tlakah a ngaih loh thu a sawi a ni," an ti a; chuvang chuan Congress party aṭangin tiam chin awm loin hnawhchhuah a ni tih an tarlang.

MPCC chuan, R Lal­zirliana Congress aṭanga hnawh chhuah a nih chhan chu party kalha a chêt vang a ni tih sawiin, "Chhan dang a awm lo a, chhan dang sawi thin mahse chhuanlam mai a ni. A ban chhàn chu MLA a nih zelna tur kawng a zawng a, Saitual district siam leh siam loh thu hmangin mahni hmasial takin politics a khêl a ni," an ti.

Lalrinliana Sailo chungchangah MPCC chuan, "A chêt dan hrang hrang leh a thusawi leh party hruaitute a sawi ṭhin dan avangin Congress party aṭangin amah a inkiltawih a, ama duh thu ngeiin Congress a chhuahsan a ni," an ti a; a chêt dan avang leh a MLA bial ngaiah tling zo dawn tawh loa a inhriat vanga báng niin an tarlang.

Congress party chuan, Dr BD Chakma chu Tuichawng Assembly constituency-ah Congress candidate ni dawn loa a inhriat avangin a lungawi lo nia sawiin, "Candidate a nih theihna turin party dang a dawr a, BJP-ah candidate ni thei dawna a inhriat avangin Congress aṭangin a báng a ni. Mimal hamṭhatna bâk chhan dang a awm lo," an ti.

MPCC chuan, Congress MLA ṭhin mi pathum, Congress aṭanga chhuakte vangin Congress chhungah danglamna a awm lo nia sawiin, "Hruaitu ni ve ta chu Congress aṭanga an chhuah chuan tu tute emaw, an kawih her theihte chuan an zui ve tur a ni a, mahse, vawiin thleng chuan anmahni zuitu Congress mi uiawm tak an la awm lo," an ti a; mi pathumin an chhuahsan hnuah Congress party mite chu an phûr em em niin an tarlang.