Larsapin L Biakliana seminar a hmanpui

Mizoram University-a Mizo department, Mizo Academy of Letters (MAL), Saitual College leh Saitual Literature Club-te chuan nimin khan Saitual College-ah 'International Seminar Commenemorating The Birth Centenary of L Biakliana' an buatsaih chhunzawm a, Governor Kummanam Rajase­kharan-a'n a hmanpui.

Governor chuan, L Biakliana thu ziah hrang hrangte leh a pawi­mawhnate sawiin, "Thu ziakmite chu khawtlang leh ram inkhaihhruai nana an ngaihtuahna leh finna hlu tak hlantute an ni. Mithiam hmasate thu­ziak hnutchhiah ṭha tak tak avangin kan hnam ziaráng leh kan pipute'n hun an hman dan hrang hrangte kan hriat phah a, hei hi kan hnam humhalh­na kawng atan a ṭangkai hle a ni," a ti. Governor hian lehkhabu pahnih, 'Mizo awmdan hlui' tih leh 'William Shakespeare leh Hamlet' tih a tlangzarh nghal.

Khualzahawm, MZU vice chancellor Dr KRS Sambasiva Rao chuan, Mizo mipuite'n mikhual an dawnsawn dan leh mikhualte an ngaihsak dan chu ropui a tih thu a sawi a, "Heng Mizo nun ze mawite hi ram páwn mite'n an hriat zau zel atan a awhawm hle. Mizo ṭawng hi mi dangte pawhin awlsam zawka an zir zung zung theih nan hmalak a pawimawh," a ti.

Seminar hi October 18-ah ṭan a ni a; Mizoram University, Champhai College, Saitual College, Mizoram Law College leh Myanmar aṭangte'n palai an kal a, mi 24-te thuziak ngaihthlak a ni.