Thawhhona Thuthlung bawhchhiat thu E.Lungdar MPF Forum-in an puangzar

Mizoram People Forum (MPF) Hrangturzo Constituency Forum chuan hnuaia East Lungdar Local Forum chuan October 17, 2018 Hrangturzo bial mipui hriat turin thu an ti­chhuak a; October 17, 2018 khan Congress party-in MPF leh political party-te Thawhhona Thuthlung bawhchhiain, mipui vantlang ruai an buatsaih tih an tarlang.

East Lungdar MPF chuan, MPF leh political party-te Thawhhona Thuthlung no. 8(2)-ah, "Heng Thawhhona Thu­thlung hi bawhchhia an lo awm a, finfiah ngei a nih chuan MPF-in an bawh­chhiatna constituency/area huam chhungah an puangzar thei ang," tih a nih avangin, Thuthlung bawhchhiat thu chu an puangzar ta tih an tarlang a ni.

MPF chuan, "Dt. 17th. October 2018-ah Congress party chuan Hrangturzo Congress Block Conference, Thangburha Hall, East Lungdarah an hmang a. He an Conference-ah hian mikhual ei tur chhuanlama tlang ruai siam a, nunaute nena ruai ṭheh a ni chu MPF chuan ngun takin a ngaihtuah a. Kan Thawhhona Thu­thlung no. 2(4)-in 'Mipui vantlang tana ruai ṭheh leh picnic tih loh ni se' tia a sawi nen inkalh leh mahni thuthlung bawh­chhiatna leh zah lohnaah MPF chuan a ngai," a ti.

East Lungdar MPF chuan, Hrangturzo Congress West Block Conference, Khawlailungah pawh ruai an lo ṭheh tawh avangin MPF Constituency Forum hruaitute'n hmun dangah chuan ruai siam tawh lo turin an lo ngen tawh tih an tarlang a, "MPF, East Lungdar Local Forum chuan ṭawngka leh ziakin kan ngen nawn ve leh a, chuti chunga ruai an ṭheh hi MPF chuan pawi a ti tak zet a ni," an ti. Thawhhona Thuthlung chu political party tin president ṭheuhte hming ziah hnan ngeia thawhhona a nih avangin Congress party-in an bawhchhiat thu chu MPF-in an puangzar ta niin an sawi.

MPF chuan, MIzoram inthlanpui awm turah MPF leh political party-te Thawhhona Thuthlung chu ngai pawimawha zâwm vek turin political party tin an ngen nawn leh a; MPF hmalakna leh rawngbawlnaah ṭang tlang a, ṭawngṭai chunga theihtawp chhuah zel turin mi tin an sáwm bawk.