Police ram tana nunna hlante sun

Nimin khan India ram hmun hrang hrangah police ram tana nunna chánte sûnna hun, 'Police Commemoration Day' hman a ni. Aizawlah chuan 1st. Bn. MAP hmunah DGP Balaji Srivastava hoin police-te'n an hmang.

1st. MAP hmuna hun hmanah hian police mi leh sa, ram tana nunna hlantute chibai bûkna leh sûn nan Commemoration Parade neih hmasak a ni a; chumi hnuah Martarte Lungphunah DGP Balaji Srivastava hoin police officer-te leh martar chhungte'n zahna leh hriatrengna pangpar an dah.

Police Commemoration Day hi district headquarters hrang hrangah leh Police unit hrang hrangah pawh hman a ni bawk a; Police thuchhuah chuan, "Police Commemoration Day a lo thlen hian kan thawhpui unau te, ram leh hnam tana an nunna hlu tak hlantute kan hre reng a, zahna chibai kan bûk nawn leh a. An kalsan an chhungte leh thawpuite Pathianin min awmpui zel se tih hi kan ṭawngṭaina a ni," a ti.

Kumina Commemoration Day-ah hian kum khat chhung (September 1, 2017 - August 31, 2018 inkar)-a India rama police, duty laia thi mi 419 an awm a, Mizoramah erawh chuan nunna chán an awm lo.

Kum 1972 aṭanga tun thlengin Mizoramah ram tana nunna hlântu police mi 56 an awm tawh a a, India ramah chuan kum 1947 aṭanga August 2018 thlengin police mi leh sa, duty laia hmelma kuta thi mi 34,837 an awm tawh thung.

October 21, 1959 khan Karam Singh, DCIO leh a hote police 20 rual chu China nena inrina bulah China sipaite'n lambunin, automatic rifle leh grenade hmangin an lo bei a, India police 10 an thih bakah, pasarih chu hliam na tak tuar chungin China sipaite'n an man a; mitthite ruang chu China sipaite'n November 13, 1959-ah India kutah a hlân a, an ruang chu Ladakh-a Hot Springs-ah chawimawina famkim nen hâl ral an ni.

China sipaite'n India police-te an beiha mi 10 an kah hlum ni, October 21 chu kum 1960 aṭangin Police Commemoration Day atan hman a ni a; kum tin hman zui niin, police, ram tana nunna hlantu, an duty laia thite hriatrengna leh chawimawina hun atan hman a ni ta a ni.