Cheng nuai 245 hû rangkachak man

Directorate of Revenue Intelligence (DRI), Aizawl Regional Unit leh Aizawla 46 Assam Rifles chuan October 18, 2018 zan dar 8:30 vel khan Sihphirah rangkachak tawlhrûk tlang 45 an man a, a vaiin kg 7.482 niin, cheng nuai 245 vel hûa chhut a ni.

DRI leh Assam Rifles-te hian an thu sawi bawhzuiin, Aizawl aṭanga Silchar pan tur maxicab AS-24 C-1276 chu Sihphirah an lo châng a; maxicab-a chuang Myanmar lam mi pahnih - Thang Thawn Mung (19) leh Do Sian Lang (18)-te hnen aṭangin rangkachak an man a ni.

DRI tarlan danin, rangkachak neitua puh mi pahnihte hi Myanmar lam mi niin an insawi a, Myanmar aṭangin Zokhawthar kaltlangin lak luh niin, Guwahati-a pek chhâwn tur a ni.

Rangkachak kengtute hian dan anga rangkachak lak luh leh kawl phalna an nei lo a, DRI-te chuan Customs Act, 1962 tlawhchhanin an man.

Kumin kum kal lai mekah West Bengal leh India hmarchhak bial chhunga DRI-te'n Bangladesh, Myanmar, Bhutan, Nepal leh China ramte aṭanga rangkachak tawlhrûk kg. 298.173 chuang an man tawh a, chu'ngte chu market rate-in cheng nuai 9084 vel hû a ni.

Directorate of Revenue Intelligence chuan, ramri kâna thil sual titute leh thil tawlhruk hriate chu DRI hnenah hrilh turin an ngen a, "Hetianga report petu hming leh nihna hi fimkhur thei ang bera thup tlat ṭhin a ni a, lawmman (reward) ṭha tak pek an ni ṭhin," an ti.

Reward scheme hre chiang duh tan website http://dri.nic.in/main/reward ah en theih a ni a, DRI be pawp duh tan weblink http://dri.nic.in/main/contact... tlawh theih a ni bawk.