YMA-in lawmman hrang hrang a sem

October 19, Zirtawpni chhun leh zana Vanapa Hall-a YMA Rorel Inkhawm vawi 2-naah lawmman leh chawimawina chi hrang hrang sem a ni a; YMA kumpuan bawhzui ṭha ber lawmman chu Saitual Group leh Bethlehem Vengthlang Branch hnenah hlan niin, ramngaw leh nungcha humhalh ṭha ber lawmman chu Chalfilh Group leh Haulawng Branch hnenah hlan a ni.

Chhun lam inkhawma ramngaw leh nungcha humhalh ṭha lawmman semah, YMA group zingah pakhatna chu Chalfilh group an ni a, Saitual group leh Tuipuiral group-te pahnihna leh pathumna an ni. Branch zingah pakhatna chu Haulawng branch an ni a, Chaltlang branch pahnihna niin, Khawzawl Zuchhip branch pathumna an ni. Group leh branch pakhatnate'n Rs. 5,000, pahnihnate'n Rs. 3,000 leh pathumnate'n Rs. 2,000 an dawng.

Zan lam inkhawmah YMA kumpuan bawhzui ṭha lawmman sem a ni a; group-ah Saitual group pakhatna niin, Tuipuiral group leh Khawzawl group-te'n an dawt. Branch-ah Bethlehem Vengthlang branch pakhatna an ni a, Chaltlang Lily Veng Branch pahnihna niin, Sialsuk branch pathumna an ni.

Mizo zinga chhuanawm bika an ngaih mi panga hnenah chawimawina Rs. 5,000 ṭheuh an hlan a; chu'ngte chu Asian Games-a hockey-a silver medalist Lalremsiami, Youth Olympic 2018-a gold medalist Jeremy Lalrinnunga, weightlifter, thisen vawi 69 pe tawh C Lalremruata, Aizawl Electric Veng, thisen vawi 67 pe tawh RC Rokhum, Mission Veng, thisen vawi 61 pe tawh Rebecca Saimawii, Dawrpui leh, thisen vawi 56 pe tawh Zothantluangi, Mission Veng te an ni.

YMA Rorel Inkhawmah hian rorel palai 1,517 an kal a; Central YMA hruaitu hlui mi pariat leh YMA member thi mi 810 sûnna hun hman a ni.

YMA lawmman dawngtute
I. Kumpuan bawhzui ṭha
Rank Group Branch
1-na Saitual Group Bethlehem Vengthlang Branch
2-na Tuipuiral Group Chaltlang Lily Veng Branch
3-na Khawzawl Group Sialsuk Branch
II. Tuihna humhalh ṭha
Rank Group Branch
1-na Khawzawl Group Khuangthing Branch
2-na Chalfilh Group Vaphai Branch
3-na Saitual Group Maite Branch
III. Faina leh thianghlimna bawhzui ṭha
Rank Branch
1-na Zarkawt Branch
2-na Kanan Branch, Aizawl
3-na Zawlnuam Ṭhuampui Branch
IV. Ramngaw leh nungcha humhalh ṭha
Rank Group Branch
1-na Chalfilh Group Haulawng Branch
2-na Saitual Group Chaltlang Branch
3-na Tuipuiral Group Khawzawl Zuchhip Branch
V. Inter Branch YMA Video Clip
Rank Branch Lawmman
1-na YMA Mission Veng Branch Rs. 10,000
2-na Ramhlun North Branch Rs. 7,000
3-na Republic Vengthlang Branch Rs. 5,000
VI. YMA Branch chanchinbu ṭha (Aizawl)
1-na Chanmarians, Chanmari Branch
2-na Zopar, Republic Vengthlang Branch
3-na MARYMA, Ramhlun North Branch
VI. YMA Branch chanchinbu ṭha (Aizawl páwn)
1-na Zonun, Kolasib Venglai Branch
2-na YMA Inleng, Kolaib Diakkawn Branch
3-na Lungpum, Sialhawk Branch
VII. YMA Chanchinbu la tam (Aizawl)
1-na Salem Veng Branch (copy 430)
2-na Chaltlang Branch (copy 381)
3-na Vaivakawn Branch (copy 323)
VIII. YMA Chanchinbu la tam (Aizawl páwn)
1-na Champhai Zotlang Branch (copy 160)
2-na Lamka Branch, Manipur (copy 131)
3-na Khawzawl Zaingen Branch (copy 118)
IX. YMA Chanchinbu la tam (percentage)
1-na Dilkhan Branch - 67.3%
2-na Khawzawl Zaingen Branch - 29.2%
3-na Salem Veng Branch - 21.6%