KHAWTHLIR

Bial viltu chhuang
Zoram People's Movement (ZPM) Aizawl North-II Constituency Steering Committee-te tun hnaia ṭhukhawm ­chuan resolution siamin, an bial viltu atan Dr Vanlalthlana an chang chu lawmawm an tih thu leh an chhuan thu an tarlang. "Hetiang mi chhuan­awm, naupang tê ni chunga doctorate degree nei leh kan ram economy dinhmun hniam taka economic leh commerce lama mi chungchuang tak kan chang hi kan lawm. ZPM policy chung­changah kut hnathawktute tana sawhthing, hmunphiah leh thlai chi hrang hrang­ah market, global level thlenga chak taka lo zawng lâwktu a ni hi kan lawmin kan chhuang em em a ni," an ti.

IKK inkhawmpui
Isua Krista Kohhran (IKK), Chhim Division chuan October 19, Zirtawpni aṭang khan Thenzawl Vengthar IKK biak-inah inkhawmpui vawi 40-na an hmang a, nizan khan a ṭiak. IKK Chhim Division-ah hian pastor bial pali -
Thenzawl, Serchhip, Hnahthial leh Bunghmun bialte a awm a; inkhawmpuiah hian Inrinni khan rorel inkhawm an nei a, nimin chawhma khan kohhran upa atan mi pasarih nemngheh an ni.

Evangelistic Gathering nei
Union of Evangelical Students of India (UESI) hnuaia Aizawl Inter Collegiate Evangelical Union (AICEU) leh Aizawl Evangelical Graduate Fellowship (AEGF)-te chuan, October 20, Inrinni khan Synod Conference Centre-ah college leh higher secondary school hrang hranga zirlaite pualin 'One Day Evangelistic Gathering' an buatsaih. Zirlai 180 vel an tel a, thupui 'Salvation in Christ alone' tih chu Upa Chhawnvunga, Mission Vengin ṭum hnih a sawi a ni.