Aihlît vanga damlo mi 7 hmu chhuak tawh ; Chakai hmin ṭha a hlauhawm loah ngai
Mizorama doctor-te'n tun hnai khan chakai eitu, chakaia natna awm vanga damlo mi pasarih an hmu chhuak nia sawi a ni. Hei hi Mizoramah thil thar a nih rualin, chakai chu hmin taka chhum a nih chuan a hlauhawm lo tih doctor-te'n an sawi.
October 20, Inrinni khan Aizawl Civil Hospital Doctor's Seminar Room-a Health department hotute'n chanchinbu mite pualin chakai chungchang zirhona an buatsaih a; he zirhonaah hian chakai ei vanga damlote natna chu a hming phuah niin, 'Aihlît' tiin an vuah.
Health department hotute chuan, tun hnai khan chuap natna chi khat, 'Paragonimiasis' chungchang an zir chiang tih sawiin, research hming chu 'Generating awareness and assessing the magnitude of paragonimiasis in Nagaland, Assam, Arunachal Pradesh and Mizoram' tih a nih thu an sawi.
Research hi India hmarchhak state paliah kalpui mek niin, kum thum chhung zir chian tur a ni a, research atana sum tumtu chu sorkar laipuia Department of Biotechnolgy a ni. Mizoram bikah chuan pathologist Dr Lalchhandama chu principal investigator a ni a, Aizawl District TB officer Dr Lily Chhakchhuak pawh telin, mi dang pali an tel bawk.
Research hi June 2018-ah ṭan a ni a; an zir chianna aṭanga an hmuhchhuah dan chuan, Mizorama chakai ṭhenkhatah Aihlît natna tia an vuah chu a awm. Aihlît chuan chuap tan harsatna a siam a, TB ang deuhin a lang a, TB anga enkawl pawh an lo awm tawh ṭhin.
Aihlît veite chu khâk thî, khuh, thaw-hah, áwm ná angin a lang chhuak ṭhin a; damlo ṭhenkhat chu TB emaw tih an nih hnuah chakai an ei dante an zir chiang a, damlo pakhat chu thiin nasa takin a luak ṭhin a, an rihna a tlahniam a, an hmel a dáng bawk. Doctor-te'n uluk taka a zir chian hnuah a natna chu Aihlît natna a ni tih an hmu chhuak a ni.
Chakai ei vanga damlote chu chakai hmin ṭha lo an ei vang te, chakai rawh hmin ṭha lo leh âi-um an ei vangin chakaia natna awmte an kaiah ngaih an ni. Chutih rualin, chakai chu ei dáwnah celcius degree 60 chinah minute 5-10 chhung tal chhum chuan Aihlît chu a hlauhawm lo niin doctor-te chuan an sawi. Aihlît chu chakai bakah, chêngkawl leh kaikuang aṭang pawhin kai theih a nih thu an sawi bawk.
Mizoram Health department hotute chuan, Aihlît damdawi atana hman tur New Delhi-a doctor zirlaite an zawntir hnuah an hmu tawh tih sawiin, tam zawk nei turin chah dan an zawng mek tih an sawi.
Aihlit chungchang
# Aihlît chu chakai, chêngkawl leh kaikuang aṭangin a kai theih
# Aihlît veite chu an kai aṭanga thla ruk hnuah an khâk a thi ṭan
# TB anga ngaih theiha a thawh avangin chakai ei ṭhin chuan inrinhlelh nachang hriat a tha
# Chakai chhum dawnah kut fai tak sil ni se
# Aihlît veite chu khâk thî, khuh, thaw-hah, áwm ná angin a lang chhuak ṭhin
# Chakai ei dáwnah celcius degree 60 chinah minute 5-10 chhung tal chhum tur
# Chakai ei ṭhin zingah inringhlel an awm chuan doctor-te râwn vat ni se