Mizoramah Swasth Bharat Yatra ṭan a ni
Food Safety and Standard Authority of India (FSSAI) hmalaknain, ei leh in thianghlim neih kawnga mipuite zirtirna tura beihpui thlakna, 'Swasth Bharat Yatra' chu October 20, Inrinni zing khan Mizoramah ṭan a ni a; an hawn nan Inrinni zing khan Aizawlah kawngzawh - Prabhat Pheri-Gandhi Walk neih a ni.
Swasth Bharat Yatra bul ṭanna hi Millennium Centre parking tualah neih a ni a, FSSAI thawhpui event organiser, Meraki India-te'n kaihruaiin, Prabhat Pheri-Gandhi Walk chu Health Services joint director (Food & Drug Administration) Lalsawma'n a vai liam. Kawngzawha telte chu Millennium Centre aṭangin Aijal Club thleng an kal a, Aijal Club-ah ei leh in hrisel neih kawnga inzirtirna leh thutiam sawi rualna hun hman a ni.
Aijal Club aṭang hian Cycle Rally neih leh a ni a, Mizoram vice chancellor Prof. KRS Sambasiva Rao chuan a vai liam. Cycle Rally-a telte chu Bawngkawn thleng an tlan. Inrinni chawhnuah Millennium Centre kawtah hun hman leh a ni bawk a; ei leh in hrisel chungchangah inzirtirna hun hman a ni.
Swasth Bharat Yatra hi FSSAI chuan October 16, 2018 (World Food Day) aṭangin an kalpui ṭan a; India rama state-te chu tract parukah ṭhenin an tuam a, Mizoram chu track-6 ah a awm. Track tina feh chhuakte'n an area ṭheuh an tuam zawhah, January 27, 2019-ah New Delhi-ah a hmáwrbàwkna hun hman a ni ang.