Lumpsum HSS ngaihsak lotute hre reng turin Joint SU-in mipui chah

Lumpsum grant-in-aid higher secondary school (HSS) awmna khaw pakuaa zirlai pawl intél khawm, Joint Students' Union chuan thuchhuah siamin, November 28, 2018-a Mizoram inthlanpui neih turah, adhoc grant-in-aid dinhmuna hlángkai tura an an phûtna kawnga an khawtlang hmakhua ngaihsak lotute hre reng turin khaw pakuaa mipui­te an chah.

Joint SU chuan, lumpsum aided aṭanga adhoc grant-in-aid dinhmuna hlànkai phûta school managing board-te leh MIGLAHSSA-te'n Mizoram sorkar hnena an duhnate vawi tam an lo thlen tawh chu MLA General Election puan a nih hmain sorkarin a tihhlawhtlinsak duh lo tih an tarlang a; hei vang hian lumpsum aided HSS awmna khaw pakua - Phullen, Sakawrdai, Thingsulthliah, East Lungdar, NE Khawdungsei, Zawlnuam, West Phaileng, Farkawn leh Zobawk khuaa Joint SU-te chuan Congress sorkarah chuan beisei an nei tawh lo tih an sawi.

Kumina MLA in­thlanpui awm turah zirna ngaihsak a, zirna kal­phung fel taka kalpui theih tur sorkar thar a pian ngei theih nan theih­tawpa hmalak an tum thu sawiin, Joint SU chuan, "Lumpsum aided HSS dinna khaw pakuaah hian zirna ngaihsak loh tur MLA candidate chu rawn campaign buai lo turin a chah a ni," an ti.

Lumpsum HSS awmna khaw pakuate mai bakah, lumpsum aided HSS chhawrtu khaw hrang hrang mipuite pawh an zirlaite'n zirna-in changtlung zawk an mamawh vanga ni 40 chuang class an kal loh phah chu hre reng turin an chah a, "Khawtlangin kan phurrit min chhâwk ve tawh tura kan ṭah-awh ngawih ngawih lai pawha kan harsatna min hai der luihsak tlattu, kan tu leh fa, kan khawtlang hmakhua min ngaihsak lotu leh thingtlang mite engahmah min ngai lotute hre reng turin kan ngen a ni," an ti bawk.