A fing hmasa apiang MNF-ah an lut - Zorama

Serlui MNF North & South Joint Block chuan October 20, Inrinni khan Vairengte community hall-ah mi thar lawm luh leh campaign hawnna inkhawm an buatsaih a; MNF president Zoram­thanga'n thu sawiin, a fing hmasa apiang Congress aṭanga chhuakin MNF-ah an lut niin a sawi.

Zoramthanga chuan, tunlaiin Congress chhuahsana MNF-a luh miin an chîng nia sawiin, "A fing hmasa a piangte an lo lut ruih ruih a, thinlung takin kan lo lawm che u a, lo luh belh zel turin mi tin kan sáwm a ni," a ti.

Vairengte leh a chhehvel khua, Serlui bial hrang hrangte chu MNF sorkar hunah chuan an vannei thuah hnih dawn nia sawiin Zorama chuan, "Silchar aṭanga bungrua leh engkim luhna kawtchhuah in ni a, in dinhmun hi a pawimawhin a hahthlak hle. Kan sorkar hunah bungrua leh engkim lo luh dan tur kan ruahman a, Kolkata aṭangin lawngin rei lo têah Chittagong lo thlengin, Tlabungah, Aizawlah a lo thleng dawn a ni," a ti a; chutih hunah chuan Vairengte kaltlangin vai hoin Mizoram aṭangin an mamawh an la lut ve tawh dawn niin a sawi.

MNF President chuan, Congress sorkarin vai company, contractor leh supplier-te an duhsak uchuak avangin kawngpuiin a tuar a, sorkar leh mipuiin an retheih phah niin a sawi a, "Chief Minister Pu Lal Thanhawla, kan kawngpui chhe lutuk pawh hre lo lui a ni hi a vanduaithlak tak zet a ni," a ti.

Inkhawmah hian MNF party ticket-a Serlui biala ding tura ngaih Lalrinsanga Ralte pawhin thu a sawi a ni.