MNF-in an candidate tur an puang ; Aizawl East-I bialah Zoramthanga
Mizo National Front (MNF) chuan November 28, 2018-a Mizoram Legislative Assembly inthlana an party candidate turte nimin khan Vanapa Hall-ah an puang. Candidate hi bial 39 a ding tur puan niin, Tuichawng biala ding tur puan a la ni lo a; MNF president Zoramthanga chu Aizawl East-I bialah a ding dawn.
Candidate puan leh MNF din champha vawi 57 lawmna inkhawm hi MNF vice president R Tlanghmingthanga'n a kaihruai a; MNF president Zoramthanga chuan, kum 2018 inthlanah MNF-in sorkarna an siam dawn nia sawiin, "Congress hian sorkar an inring tak tak tawh lo. Term khat an sorkarnaah khan Congress-te an che lutuk lo a, a term hnihnaah chuan pawisa an nei tawh lo a, zute an zuar a ni," a ti.
Zoramthanga chuan, Pathian leh mipui zara sorkarna an siam chuan Finance department hotute a koh khawm nghal tur thu sawiin, "Leibá kan neih zat ka zawt ang. Leibaah hian sorkar leh sorkara leibat chu enghelh awm a ni lo. A pawimawh chu, mimal leh company-a bat zat a ni a, chu chu ka chhût chhuahtir ang," a ti a; kum 1998-a sorkarna an siam pawhin, Congress sorkarin leibá a hnutchhiahte chu peace bonus hmangin an rûl niin a sawi.
MNF President chuan, kum 1998-a sorkarna an siam tirhah an la zei lo tih sawiin, "Keimah ber pawh vawi khat ka Chief Minister-na a ni a, ka zei lo khawp mai. Kan sorkar hmasaka tihfel loh leh tih dik loh kan neiha ngaihdam ka dil a ni. Mipuite kaihhruai kan tum danah tih dik lote pawh kan nei ang," a ti.
Kum 1986-ah MNF leh India sorkarin mipui, kohhran leh tlawmngai pawlte ngenna vangin inremna an siam thu sawiin Zoramthanga chuan, "MNF thuthlung titawp turin inremnaah khan tih a awm lo. Amaherawhchu, Indian Constitution hnuaia inrem kan nih avangin ramhnuai constitution tidanglam turin min ti a, kan thubuaite titawp turin ka ti ve thung a ni," a ti a; inremna thuthlung an siam chu ngaihtuah chian poh leh a thûk niin a sawi.
MNF President chuan, MNF leh India sorkar inremna chu khawvel hmun danga mite pawhin mak an tih khawpa inremna ṭha a nih thu sawiin, "Kan inremna hi Parliament pawhin an tidanglam thei lo a, a tidanglam theihtute chu a inremate kan ni. Inremna thuthlung angin Mizoram sorkar paih thlak a ni a, electoral roll-a hming pawh chuang loin, interim sorkar kan siam kha mak an ti hle a ni," a ti.
Inkhawmah hian MNF President hian kumin MLA inthlan lo awm tura an party manifesto tur a tlangzarh nghal a ni.
MNF candidate tur zingah hian minister leh MLA ni tawh leh ni mek 17 an awm a, mi 17 chu ṭum khat MLA candidate an nihna tur a ni. Candidate tur mi 39-te kum chawhrual chu 55 a ni. Kum 30-40 inkar mi pahnih, kum 41-50 inkar mi 12, kum 51-60 inkar mi 11, kum 61-70 inkar mi pakua leh kum 70 chung lam mi panga an awm. Candidate upa ber chu Aizawl West-I a ding tur K Sangṭhuama (78) a ni a, a naupang ber chu Champhai South-a ding tur TJLalnuntluanga (38) a ni.
MNF office bearer zingah Vanlalzawma chu MLA inthlan hnuhnung bera a dinna Aizawl West-III a ding dawn a, president Zoramthanga chu South Tuipui aṭangin Aizawl East-I ah a ding dawn a, sr. vice president Tawnluia chu Aizawl South-III aṭangin Tuichang bialah insawnin, vice president Dr. R Lalthangliana chu Lunglei West aṭangin South Tuipuiah a insawn dawn a, vice president R Tlanghmingthanga chu candidate a ni tawh dawn lo.
Inthlan hnuhnung bera Indian National Congress (INC) ticket-a MLA atana thlan tlin MPCC vice president hlui R Lalzirliana chu MNF ticket-in a bial ngai Ṭawiah a ding dawn a, Tuichang aṭanga thlan tlin Lalrinliana Sailo chu Chalfilhah a ding thung ang.
2018 inthlana MNF candidate turte
A/C no. Bial Candidate Hming Khua/Veng
1. Hachhek Lalrinenga Sailo Durtlang
2. Dampa Lalrintluanga Sailo Luangmual, Aizawl
3. Mamit H Lalzirliana Mamit
4. Tuirial Sailothanga Sailo Chhinga Veng
5. Kolasib K Lalrinliana Kolasib Hmarveng
6. Serlui Lalrinsanga Ralte Dinthar, Aizawl
7. Tuivawl Lalchhandama Ralte Leitan, Aizawl
8. Chalfilh Lalrinliana Sailo Upper Republic
9. Ṭawi R Lalzirliana Armed Veng
10. Aizawl North-I Lalringliana Bawngkawn
11. Aizawl North-II Laltlanzova Khiangte Ramhlun South
12. Aizawl North-III C Lalmuanpuia Chanmari West
13. Aizawl East-I Zoramthanga Ramhlun Venglai
14. Aizawl East-II Robert Romawia Royte Chhinga Veng
15. Aizawl West-I K Sangṭhuama Electric Veng, Aizawl
16. Aizawl West-II Lalruatkima Kanan Veng, Aizawl
17. Aizawl West-III Vanlalzawma Tuikhuahtlang
18. Aizawl South-I K Liantlinga Venghlui
19. Aizawl South-II Denghmingthanga Kulikawn
20. Aizawl South-III Dr F Lalnunmawia Chawnpui, Aizawl
21. Lengteng L Thangmawia Mission Vengthlang
22. Tuichang Tawnluia Chawnpui, Aizawl
23. Champhai North Dr ZR Thiamsanga Kulikawn
24. Champhai South TJ Lalnuntluanga Zonuam, Aizawl
25. East Tuipui Ramthanmawia Laipuitlang
26. Serchhip C Lalramzauva Kulikawn
27. Tuikum Lalrinawma Chhinga Veng
28. Hrangturzo Lalchamliana Electric Veng, Aizawl
29. South Tuipui Dr R Lalthangliana Kanan Veng, Aizawl
30. Lunglei North Dr Vanlalṭanpuia Pukpui, Lunglei
31. Lunglei East Lawmawma Tochhawng Lunglei Ramthar
32. Lunglei West C Lalrinsanga Lunglei Bazar Veng
33. Lunglei South Dr K Pachhunga Lunglawn, Lunglei
34. Thorang R Rohmingliana Ramhlun North
35. West Tuipui F Robert Hmingthansanga Lunglei Farm Veng
36. Tuichawng La puang lo -
37. Lawngtlai West C Ramhluna Bungkawn, Aizawl
38. Lawngtlai East H Lalbiakzauva Lawngtlai Electric Veng
39. Saiha Dr K Beichhua Siaha Bazar
40. Palak M Chakhu New Siaha