MLA aṭangin Hmingdailova a bâng

Indian National Cong­ress (INC) ticket-a Tuirial biala ṭum hnih thlan tlin tawh MLA, Hming­dailova Khiangte chuan nimin khan Assembly speaker Hiphei hnenah MLA aṭanga bànna a thehlut a, a bial ngaiah hian kumin inthlanah independent-a din a tum.

Hmingdailova Khiangte hian a bànna hi Speaker bangla-ah kalin Speaker hnenah a thehlut a; Speaker-in pawmin, hming a ziah hnan hnuah Assembly Secretariat-ah a thehlut leh a ni.

Vanglaini palai zawh­na chhangin Hming­dailova Khiangte chuan, Congress party-a a lungawi loh vanga bànna thehlut a nih loh thu sawiin, "Candidate ka chang lo hi ka bial mipuite an na em a, an rilru natna leh lungawi lohna damdawi ṭha ber chu ka bial ngaiah independent-a din a ni. Independent-in ka ding dawn," a ti.

Hmingdailova Khiangte hi kum 2008 leh 2013 inthlanah Tui­rial bial aṭanga thlan tlin a, MLA a nih chhung­in Mizoram Youth Co­mmission chairman leh parliamentary secretary hnate a chelh a ni.

Tun term chhung hian Hmingdailova Khiangte hma hian - Lal Thanzara, Lalrinliana Sailo, R Lalzirliana leh Dr. BD Chakma-te chuan MLA aṭanga banna an lo thehlut tawh a, an vai hian pawmsak vek niin, Lal Thanzara chu a bial ngai aṭangin by-election-ah MLA atana thlan tlin leh a ni. Midang zawng chu banna an thehluhin by-election buatsaihna hun a awm tawh loh avangin an bial a ruak a ni.